Կոչ ենք անում լացող և աղաղակող եվրոպացի լիբերալներին դուրս գալ խաղաղ բանակցությունների ճանապարհից․ Սեյարտո

Հունգարիան եվրոպացի լիբերալներին առաջարկում է «դուրս գալ» Ռուսաստանի և ԱՄՆ-ի միջև բանակցությունների ճանապարհից և չմիջամտել Ուկրաինայի հակամարտության խաղաղ կարգավորմանը։ Այս մասին հայտարարել է Հունգարիայի արտաքին գործերի և արտաքին տնտեսական կապերի նախարար Պետեր Սիյարտոն՝ լրագրողների խնդրանքով մեկնաբանելով Գերմանիայի ԱԳՆ ղեկավար Աննալենա Բաերբոկի հայտարարությունները Ուկրաինային ռազմական օգնությունը շարունակելու անհրաժեշտության մասին, փոխանցում է ՏԱՍՍ-ը։

Իր գերմանացի գործընկերոջը անվանելով «Եվրոպայի ամենանվիրված պատերազմամետ քաղաքական գործիչներից մեկը»՝ Սիյարտոն ասել է. «Մենք չափազանց վնասակար ենք համարում ցանկացած առաջարկ, որը կարող է խոչընդոտել ԱՄՆ-Ռուսաստան ձևավորվող համաձայնագրին։ Մենք վնասակար և վտանգավոր ենք համարում ցանկացած առաջարկ, որը հակասում է խաղաղության ջանքերին, ուստի կոչ ենք անում լացող և աղաղակող եվրոպացի լիբերալներին դուրս գալ խաղաղ բանակցությունների ճանապարհից»:

Նախարարը նաև նշել է, որ Հունգարիան «ամենավճռականորեն մերժում է Բրյուսելի կողմից եվրոպացի քաղաքացիների փողերի օգտագործումը պատերազմի հետագա ֆինանսավորման համար»։

 «Եվրոպական տնտեսությունն արդեն բավականաչափ չորացել է: Եվրոպան փող չունի Ուկրաինային նոր միլիարդներ ուղարկելու համար: Ապագայում ոչ մի լումա կամ եվրո ցենտ չպետք է ծախսվի պատերազմի վրա»,- ընդգծել է Սիյարտոն՝ ելույթ ունենալով Բուդապեշտում Ավստրիայի Ազատություն կուսակցության գլխավոր քարտուղար Քրիստիան Հաֆենեկերի հետ հանդիպումից հետո կայացած մամուլի ասուլիսում:

Նրա կարծիքով, «այժմ հույս կա, որ պատերազմը կավարտվի, և անհրաժեշտ է աջակցել բանակցություններին, որոնք իրականություն կդարձնեն այդ հույսը, այլ ոչ թե դեմ գնան»։