Թրամփը Չինաստանին սպառնացել է լրացուցիչ մաքսատուրքերով

Եթե Չինաստանը մինչեւ ապրիլի 8-ը չչեղարկի 34 տոկոս մաքսատուրքերը, ապա ԱՄՆ-ը նրա համար 50 տոկոսի չափով լրացուցիչ մաքսատուրքեր կսահմանի՝ ի հավելումն արդեն հայտարարված միջոցների, այս մասին հայտարարել է ԱՄՆ նախագահ Դոնալդ Թրամփը Truth Social սոցցանցի իր էջում: Հայտնում է РБК-ն։

«Բացի այդ, Չինաստանի հետ բոլոր բանակցությունները՝ իրենց պահանջած հանդիպումների վերաբերյալ, կդադարեցվեն«, - հավելել է նա:

Ինչպես նշում Է Bloomberg-ը, այդ դեպքում Չինաստանի համար մաքսատուրքերը կարող են գերազանցել 100 տոկոսը:

Նշենք, որ Թրամփն ապրիլի 5-ից մինչև 50 տոկոս առևտրային մաքսատուրքեր է սահմանել 185 երկրների նկատմամբ ՝ դա բացատրելով ԱՄՆ տնտեսությունը վերականգնելու անհրաժեշտությամբ: Չինաստանի համար դրա չափը կազմել է 34 տոկոս, սակայն, հաշվի առնելով նախորդ միջոցառումները, այն հասել է 54 տոկոսի, նշել են Սպիտակ տանը։