ԱՄՆ էներգետիկայի նախարարը սպառնացել է Իրանին

ԱՄՆ-ն ավելի կոշտ պատժամիջոցներ կկիրառի Իրանի դեմ, ներառյալ նավթային հատվածը, եթե Թեհրանի միջուկային ծրագրի շուրջ գործարքը տեղի չունենա։ Այս մասին հայտարարել է ԱՄՆ էներգետիկայի նախարար Քրիս Ռայթը, փոխանցում է РИА Новости-ն։

«Ես, անշուշտ, կսպասեի շատ կոշտ պատժամիջոցներ Իրանի նկատմամբ և հուսով եմ, որ դրանք կստիպեն նրանց հրաժարվել միջուկային ծրագրից»,- ասել է նա CNBC-ին տված հարցազրույցում՝ պատասխանելով այն հարցին, թե արդյո՞ք Վաշինգտոնը կուժեղացնի Թեհրանի դեմ պատժամիջոցները՝ կողմերի միջև համաձայնության բացակայության դեպքում:

Ռայթն ասել է, որ ԱՄՆ-ը չի կարող թույլ տալ Իրանին միջուկային զենք ունենալ:

Ավելի վաղ Իրանի նախագահ Մասուդ Պեզեշքյանը հայտարարել էր, որ Թեհրանը ԱՄՆ նախագահ Դոնալդ Թրամփին ուղղված պատասխան նամակում հրաժարվել է միջուկային ծրագրի շուրջ Վաշինգտոնի ուղիղ բանակցություններից. բանակցությունների պատուհանը բաց է միայն երրորդ երկրների միջնորդությամբ։ Իր հերթին Թրամփը NBC News-ին տված հարցազրույցում սպառնացել է «աննախադեպ ռմբակոծումներով», եթե ԱՄՆ-ն ու Իրանը համաձայնության չգան։