Թրամփը «շատ լավ առաջարկներ» է ակնկալում Ուկրաինայի վերաբերյալ

ԱՄՆ նախագահ Դոնալդ Թրամփը հայտարարել է, որ շուտով ակնկալում է «շատ լավ առաջարկներ» Ուկրաինայում կարգավորման համար։ Այս մասին նա լրագրողներին ասել է Սպիտակ տանը՝ Սալվադորի նախագահ Նայիբ Բուկելեի հետ հանդիպման ժամանակ։

«Եվ այն ամենը, ինչ ես կարող եմ անել, դա կանգնեցնելն է: Սա այն ամենն է, ինչ ես ուզում եմ անել: Ես ուզում եմ կանխել մարդկանց մահը: Եվ կարծում եմ, որ մեզ դա հաջողվել է», - ասաց նա: «Կարծում եմ, որ շատ շուտով դուք կունենաք շատ լավ առաջարկներ»,- հավելել է Թրամփը։

Հիշեցնենք, որ անցյալ շաբաթ Թրամփի հատուկ բանագնաց Սթիվեն Ուիթքոֆն այցելել է Ռուսաստան և հանդիպել ՌԴ նախագահ Վլադիմիր Պուտինի հետ, որտեղ նրանք քննարկել են ուկրաինական կարգավորման ասպեկտները, հաղորդում է Կրեմլը։ Միևնույն ժամանակ, Սպիտակ տունը Ուիթքոֆի այցը Ռուսաստան համարել է ևս մեկ քայլ Ուկրաինայում հրադադարի հաստատման և, ի վերջո, խաղաղության համաձայնագրի ուղղությամբ։