Ոստիկաններն էլ շատ լավ գիտեն, մենք որևէ ապօրինի գործողություն չենք պլանավորում․ Արտակ Բեգլարյան

«Ոստիկաններն էլ շատ լավ գիտեն, մենք որևէ ապօրինի գործողություն չենք պլանավորում»,-լրագրողների հետ զրույցում ասաց Արցախի նախկին պետնախարար, ՄԻՊ Արտակ Բեգլարյանը՝ անդրադառնալով Ազատության հրապարակում ու դրա հարակից փողոցներում մեծ թվով ոստիկաններ բերեուն։

Նա ասաց՝ քաղաքապետարան դիմել են հանրահավաք, ապա նաև երթ ու շարունակական նստացույց անելու համար, ստացել են միայն հանրահավաքի թույլտվություն։

«Երթի ու նստացույցի վերաբերյալ, իմ գնահատմամբ, մերժման համար չհիմնավորված հիմքեր են ներկայացրել։ Իրենց խոսքով, անհնազանդության գործողություններ, որոնք սպառնում են հասարակական կարգին և այլն։ Այնինչ, անհնազանդության գործողությունները մեր քաղաքացիական իրավունքն են։ Այդ գործողությունները անհամաչափ կերպով չեն խախտելու այլ անձանց իրավունքներն ու ազատությունները»,-ասաց նա։

Բեգլարյանը հույս ունի, որ հանրահավաքի ընթացքում բանակցությունների արդյունքում ինչ-որ բան կփոխվի։

Հիշեցնենք, որ արցախցիների իրավունքների պաշտպանության խորհրդի կազմակերպած հանրահավաքն արտոնվել է, սակայն ոստիկանությունը և Երևանի քաղաքապետարանը մերժել են նախատեսված երթի և նստացույցի հայտերը։

«Երթը նախատեսված էր դեպի ՀՀ կառավարության ու Ազգային ժողովի շենքեր։ Այնուամենայնիվ, հանրահավաքի ընթացքում մենք պատրաստվում ենք կիրառել բոլոր օրինական միջոցները՝ ոստիկանության հետ համագործակցաբար մեր խաղաղ երթն իրականացնելու և իրավունքները պաշտպանելու համար։

Հ.Գ. Թեև վերջին օրերին ՀՀ իշխանությունների կողմից տարբեր բռնաճնշումներ են կիրառվում նաև Արցախցիների իրավունքների պաշտպանության խորհրդի անդամների և համակիրների հանդեպ, սակայն, վստահ ենք, որ այդ ճնշումներն էլ ավելի են ամրապնդելու մեր կամքն ու պայքարի ոգին, քանի որ մեր պահանջներն արդար են և հիմնված են բացառապես մեր իրավունքների վրա»,-հայտնել էր Արցախցիների իրավունքների պաշտպանության Խորհուրդը։