Սպիտակ տունը նշել է Դաշնային պահուստային համակարգի ղեկավարին աշխատանքից ազատելու պատճառը

ԱՄՆ նախագահ Դոնալդ Թրամփն իրավունք ունի հարգելի պատճառով աշխատանքից ազատել Դաշնային պահուստային համակարգի նախագահ Ջերոմ Փաուելին, եթե ապացույցները դա հաստատեն։ Այս մասին կիրակի օրը ABC News-ին տված հարցազրույցում հայտարարել է Սպիտակ տան տնտեսական հարցերով խորհրդական Քևին Հասեթը՝ հավելելով, որ ԴՊՀ-ն «շատ բաների համար պետք է պատասխան տա»՝ կապված Վաշինգտոնում իր կենտրոնակայանի վերանորոգման համար միջոցների գերածախսի հետ։

Հասեթը հայտնել է, որ Փաուելին աշխատանքից ազատելու Թրամփի ցանկացած որոշումը՝ 700 միլիոն դոլարի գերածախսի համար (ինչպես դա որակում է Թրամփի վարչակազմը), «մեծապես կախված կլինի այն պատասխաններից, որոնք մենք կստանանք Ռաս Վոութի՝ ԴՊՀ-ին ուղղված հարցերին»։

Ներկայացուցիչների պալատի բյուջեի հարցերով տնօրենն անցյալ շաբաթ քննադատել է Փաուելին ԴՊՀ-ի շենքերի «ցուցադրական վերանորոգման» և 2,5 միլիարդ դոլար արժողությամբ նախագծի վերաբերյալ մի շարք հարցերի պատասխանների համար։

X սոցցանցում կատարված գրառման մեջ նա նախագիծը համեմատել է Ֆրանսիայի Վերսալյան պալատի հետ՝ տանիքների այգիներով, ջրային կառույցներով և «բարձրորակ մարմարով»։

Թրամփը բազմիցս կոչ է արել Փաուելին հրաժարական տալ՝ հունվարին իր պաշտոնին վերադառնալուց հետո տոկոսադրույքները չիջեցնելու համար։ Այն հարցին, թե արդյոք Թրամփը Փաուելին աշխատանքից ազատելու լիազորություն ունի, Հասեթը, որի անունը նշվում էր որպես ԴՊՀ նախագահի պաշտոնի հավանական թեկնածու, պատասխանել է. «Այդ հարցը քննարկվում է, բայց, անկասկած, եթե պատճառ լինի, նա դա կանի»։