Բացահայտվել է արթնանալուց հետո հոգնածության զգացողության թաքնված պատճառը

Հետազոտողները Տեխասի տեխնոլոգիական համալսարանից պարզել են, որ ջրազրկումը կարող է դժվարացնել քուն մտնելը և մեծացնել հոգնածության զգացումը արթնանալուց հետո։ Հետազոտության արդյունքները հրապարակվել են SN Comprehensive Clinical Medicine (CCM) ամսագրում։

Փորձին մասնակցել է 18 տղամարդ ուսանող։ Չորս օր շարունակ հետազոտողները լաբորատորիայում հետևել են նրանց հիդրատացիայի մակարդակին և քնի որակին։ Առաջին օրը ֆիքսվել է ջրային բալանսի ելքային մակարդակը։ Երկրորդ օրը մասնակիցները լաբորատորիա էին գալիս լավ հիդրատացված վիճակում՝ նախորդ երեկոյան 500 մլ ջուր խմելուց հետո։ Դրանից հետո նրանց հրահանգվել է չխմել ջուր մինչև հաջորդ այցելությունը՝ երրորդ օրվա համար ստեղծելով թեթև ջրազրկման պայմաններ։ Չորրորդ օրը փորձարկվողները վերադառնում էին իրենց սովորական ռեժիմին։

Հիդրատացիայի մակարդակը գնահատելու համար գիտնականները օգտագործել են երեք ցուցանիշ՝ մեզի գույնը, մեզի հարաբերական խտությունը (որքան ցածր՝ այնքան լավ հիդրատացիա), և մարմնի զանգվածի փոփոխությունը։ Զուգահեռ, մասնակիցները լրացրել են քնի որակի վերաբերյալ հարցաթերթիկներ՝ որքան ժամանակ է պահանջվել քուն մտնելու համար, որքան հաճախ են արթնացել գիշերը և որքան թարմ են զգացել իրենց առավոտյան։

Տվյալների վերլուծությունը ցույց է տվել․ ջրազրկման վիճակում մասնակիցները միջինում մեկ ժամ ավելի երկար են քնել, բայց քուն մտնելը ավելի երկար է տևել, և առավոտյան ավելի հոգնած են զգացել։ Սա ցույց է տալիս, որ ջրի անբավարարությունը բացասաբար է ազդում ոչ միայն ֆիզիկական վիճակի, այլև քնի որակի վրա։

Չնայած այն հանգամանքին, որ հետազոտությունն ի սկզբանե իրականացվել է սպորտային բժշկության համատեքստում, գիտնականները նշում են, որ արդյունքները կարևոր են լայն հասարակության համար։ Հեղինակների խոսքով՝ թեթև ջրազրկումը հաճախ հանդիպող երևույթ է առօրյա կյանքում, հատկապես տաք եղանակին կամ հեղուկի քիչ օգտագործման պայմաններում։

Հետազոտողները նախատեսում են շարունակել աշխատանքը՝ ուսումնասիրելու, թե ինչպես է ջրի պակասը ազդում իմունային համակարգի աշխատանքի վրա։ Նրանց ապագա ուսումնասիրությունների կենտրոնում կլինեն նաև հղի կանայք և երեխաները, որոնք կարող են հատկապես զգայուն լինել ջրային բալանսի փոփոխությունների նկատմամբ։

Թարգմանությունը՝ Lurer.com-ի