«Մենք երբեք չենք մոռանա հայկական օկուպացիան»․ Ալիև

Ադրբեջանի նախագահ Իլհամ Ալիևը Թյուրքական պետությունների կազմակերպության անդամ պետությունների ղեկավարների խորհրդի գագաթնաժողովում հանդես է եկել ելույթով։

«Այսօր խաղաղությունն ու անվտանգությունը յուրաքանչյուր երկրի զարգացման հիմնական գործոններն են։
Մեր կազմակերպության հիմնադիր փաստաթուղթը՝ Նախիջևանի համաձայնագիրը, խաղաղությունն ու անվտանգությունը դասում է իր առանցքային նպատակների և խնդիրների շարքում։ Աշխարհի առջև ծառացած ներկայիս աշխարհաքաղաքական և անվտանգությանն ուղղված մարտահրավերների ֆոնին կարևոր է, որ թյուրքական պետությունները գործեն որպես միասնական ուժի կենտրոն՝ համաձայն անցյալ տարի Շուշիում կայացած ոչ պաշտոնական գագաթնաժողովի ժամանակ ընդունված Ղարաբաղյան հռչակագրի և այսօրվա գագաթնաժողովի թեմայի՝ նվիրված տարածաշրջանային խաղաղությանը և անվտանգությանը»,– հայտարարել է նա։

Ադրբեջանի նախագահի համոզմամբ՝ զարգացումն անհնար է առանց անվտանգության։

«Հիմա, երբ միջազգային իրավունքի նորմերն ու սկզբունքները կոպտորեն խախտվում են, մեր երկրների միջև ռազմական և ռազմատեխնիկական ոլորտներում համագործակցությունը ամենակարևոր գործոններից մեկն է։ Այս համատեքստում մենք պահպանում ենք խորը համագործակցությունը մեր դաշնակից Թուրքիայի հետ։

Միայն վերջին մեկ տարվա ընթացքում Թուրքիայի հետ անցկացվել է ավելի քան 25 երկկողմ և բազմազգ համատեղ զորավարժություն։ Հաշվի առնելով մեր երկրների միջև լայնածավալ ռազմական համագործակցությունը, ես առաջարկում եմ 2026 թվականին Ադրբեջանում անցկացնել Թյուրքական պետությունների կազմակերպության (ԹՊԿ) համատեղ զորավարժություններ»,– նշել է Ալիևը։

«Ժամանակակից աշխարհում ռազմական ուժը յուրաքանչյուր երկրի անկախության և տարածքային ամբողջականության հիմնական գործոնն է»,– հայտարարել է Ալիևը՝ հպարտությամբ խոելով Արցախի դեմ ագրեսիայի և օկուպացիայի մասին։

Ըստ նրա՝  Ադրբեջանի և Հայաստանի միջև խաղաղության պայմանագրի նախաստորագրումը Հարավային Կովկասը կվերածի խաղաղության տարածքի։

«Այսպիսով, ձեռնարկված քայլերը վերահաստատեցին Ադրբեջանի կողմից առաջ քաշված խաղաղության օրակարգը։

Մենք երբեք չենք մոռանա հայկական օկուպացիան։ Մենք մեր սրտերում հավերժ կպահենք մեր նահատակների պայծառ հիշատակը։

Մենք վրեժ լուծեցինք նրանց արյան համար մարտի դաշտում։

Մենք հասանք հաղթանակի և, միևնույն ժամանակ, արդար խաղաղության»,– հայտարարել է նա։