Իտալացի լողորդուհիներին զրկել են Եվրոպայի առաջնությանը մասնակցելու իրավունքից

Իտալիայի լողի ֆեդերացիան տեղեկացրել է, որ լողորդուհիներ Կյարա Տարանտինոն և Բենեդետա Պիլատոն 90 օրով որակազրկվել են՝ Սինգապուրի օդանավակայանի դյուտի-ֆրի խանութում օծանելիք գողանալու մեղադրանքով։ Այս պատճառով նրանք չեն կարողանա մասնակցել Եվրոպայի լողի առաջնությանը, որը կանցկացվի դեկտեմբերին Լեհաստանում։

Դեպքը տեղի է ունեցել օգոստոսին․ տեսանկարահանող սարքի կադրերում երևում է, թե ինչպես է Տարանտինոն ապրանքները դնում Պիլատոյի պայուսակի մեջ։ Իտալիայի դեսպանատան միջամտությամբ միջադեպը լուծվել է՝ մարզուհիները ստացել են նախազգուշացում և վերադարձել հայրենիք։

Տարանտինոն 2021 թվականի Եվրոպայի առաջնության բրոնզե մեդալակիր է, իսկ Պիլատոն նույն տարվա չեմպիոնուհի՝ 50 մետր բրաս սահքի մրցատարածությունում։