Տավուշում սահմանազատման հետ կապված ոչ մի պրոցես չկա, Կիրանցից արտագաղթ չի եղել․ Տավուշի մարզպետ

Տավուշում սահմանազատման հետ կապված հիմա կոնկրետ ոչ մի աշխատանք չկա, ոչ մի պրոցես, գործընթաց չկա։ Այս մասին լրագրողների հետ զրույցում ասաց Տավուշի մարզպետ Հայկ Ղալումյանը։

Հարցին, թե «երբ իշխանությունն ասում է, որ կան տարածքներ, որոնք Ադրբեջանին են պատկանում, բայց Հայաստանի տարածքում են. ի՞նչ տարածքների մասին է խոսքը», մարզպետը պատասխանել է. «Ոսկեպարի ու Բերքաբերի հատվածում նման տարածքներ ունենք»:

Մարզպետի խոսքով՝ Կիրանցի դպրոցում 37 աշակերտ է սովորում և հինգ երեխա նախակրթարան է հաճախում․ «Գյուղից արտագաղթ չի եղել։ Հիմա Կիրանցում 16 միլիոնի պետական ծրագրով տուն է կառուցվում»,– ասաց նա:

Հարցին, թե իր նշանակումը մարզպետի պաշտոնում «խծբ»–ի արդյունք չէ՞, քանի որ «քավոր–սանիկական կապերի մեջ է Նիկոլ Փաշինյանի հետ», Ղալումյանը պատասխանեց․ 

«Ես կխնդրեմ այդ տրամաբանությունից դուրս գաք։ Եթե իմ կենսագրությանը նայեք, ես վերջին տարիներին միայն 11 տարվա բանկային համակարգի ստաժ եմ ունեցել, որից 9 տարին՝ որպես կառավարիչ։ Ես չեմ ինքնաառաջադրվել, ինձ առաջադրել են մեր քաղաքական թիմի ընկերները, և նշանակվել եմ մարզպետ։ Ավելացնելու ոչինչ չունեմ»։

Ղալումյանը նաև նշեց, որ կիրակի օրը մասնակցելու է Հովհաննավանքում կարգալույծ հռչակված Ստեփան Ասատրյանի մատուցած «պատարագին», որը, ըստ նրա, չի կարող «պղծություն» որակվել։

«Մայր Աթոռը չի կարա պղծություն որակի էդ պատարագը, որովհետև այնտեղ հազարավոր մարդիկ են եղել, Մայր Աթոռը այդ իրավունքը չունի, թող իր գործերով զբաղվի»,– ասաց նա։