Մեր նախարարությունը գործարաններ կառուցելու լիազորություններ չունի. Խուդաթյան

Մեր նախարարությունը գործարաններ կառուցելու լիազորություններ չունի և չի ունեցել, այլապես այս նախարարությունը կկոչվեր Տարածքային կառավարման և օրինակ գործարանաշինության նախարարություն։ Այս մասին լրագրողների հետ զրույցում ասաց ՏԿԵ նախարար Դավիթ Խուդաթյանը՝ անդրադառնալով հարցին, թե ինչու՞ են դպրոցներ և ճանապարհներ կառուցում, այլ ոչ թե գործարաններ։

«Զարմացած եմ այդ քննադատությունից, որովհետև գործարաններում, որոնք պիտի կառուցվեն մասնավորների կողմից, պիտի աշխատեն այն մարդիկ, որոնք դպրոցներում պատշաճ կրթություն են ստացել, մանկապարտեզներում պատշաճ նախադպրոցական կրթություն են ստացել։ Հույս ունեմ, որ նաև բուհերում պատշաճ կրթություն են ստացել և գործարաններ կմտնեն որպես լավ մասնագետներ»,–ասաց նա։

Քննադատությանը, որ օրինակ, Մեդովկա գյուղում, որտեղ ընդամենը 6 առաջին դասարանցի կա, կարելի էր վերանորոգել դպրոցը և նոր դպրոց կառուցելու վրա այդքան շատ գումար չխասել, Խուդաթյանն ասաց. «Այն բոլոր տեղերում, որտեղ մենք դիտարկում ենք դպրոցների վերանորոգումը, հիմնվում ենք բոլոր դեպքերում գոյություն ունեցող շենքի տեսակի և սեյսմիկ եզրակացության վրա։ Այնտեղ, որտեղ հնարավոր է հիմնանորոգել դպրոցները, մենք հիմնանորոգում ենք, այնտեղ, որտեղ հնարավոր չէ հիմնանորոգել դպրոցները և անհրաժեշտություն կա կառուցել նոր դպրոցներ, մենք այնտեղ կառուցում ենք նոր դպրոցներ»։