«Հրապարակ» օրաթերթի գլխավոր խմբագիր Արմինե Օհանյանի նկատմամբ քրեական հետապնդում չի հարուցվի

«Հրապարակ» օրաթերթի գլխավոր խմբագիր Արմինե Օհանյանի նկատմամբ քրեական հետապնդում չհարուցելու մասին որոշում է կայացվել։

«2025 թվականի հունվարի 10-ին Քրեական օրենսգրքի 330-րդ հոդվածի 2-րդ մասի 3-րդ կետով նախաձեռնված քրեական վարույթով դատախազը 2026 թվականի մարտի 23-ին որոշում է կայացրել Ա.Օ.-ի նկատմամբ՝ ՀՀ քրեական դատավարության օրենսգրքի 12-րդ հոդվածի 1-ին մասի 1-ին կետով հանրային քրեական հետապնդում չհարուցելու մասին»,- լրատվամիջոցներին  հայտնել են ՀՀ գլխավոր դատախազությունից։

Հիշեցնենք՝ մարտի 17-ին «Հրապարակ» օրաթերթի խմբագիր Արմինե Օհանյանը հրավիրվել էր Քննչական կոմիտե։ «Հրապարակ» օրաթերթի՝ մոտ երկու տարի առաջ հրապարակված խմբագրականի հիման վրա Քննչականը վարույթ էր հարուցել՝ «զանգվածային լրատվամիջոցների օգտագործմամբ իշխանությունը զավթելուն և սահմանադրական կարգը բռնի տապալելուն ուղղված հրապարակային կոչեր» հոդվածով:

Արմինե Օհանյանը հայտարարել էր՝ խոսքի համար հետապնդումներ են ձեռնարկվում մի մարդու իշխանության օրոք, ով նախկինում՝ լրագրող եղած ժամանակ, իր հրապարակումներում բազմիցս է բռնության կոչեր հնչեցրել։