ԵՄ-ն Պուտինին մեղադրել է դեպի Եվրոպա միգրանտների հոսքի համար

Ռուսաստանի նախագահ Վլադիմիր Պուտինը, ենթադրաբար, Եվրոպա միգրացիայի «գլխավոր շարժիչ ուժն» է՝ վերջին տասնամյակում հակամարտությունների «սնուցման» գործում իր դերի պատճառով, Financial Times-ին ասել է եվրոպացի բարձրաստիճան պաշտոնյան։

«Պուտինը միշտ ներգրավված է եղել այս լայնածավալ միգրացիոն գործընթացներում։ Միշտ Վլադիմիր Պուտինը», - Financial Times-ին ասել է ներքին գործերի և միգրացիայի հարցերով եվրահանձնակատար Մագնուս Բրունները։

Նրա խոսքով՝ Սիրիայից Եվրոպա միգրանտների հոսքը տեղի է ունեցել 2011 թվականին սկսված քաղաքացիական պատերազմում Ռուսաստանի կողմից նախագահ Բաշար ալ-Ասադին աջակցելու պատճառով։ Դրանից հետո՝ 2015-2016 թվականներին, ավելի քան 2 միլիոն սիրիացի ապաստան է խնդրել ԵՄ-ում։ «Այնուհետև ԵՄ-ն ընդունել է բազմաթիվ ուկրաինացիների Ուկրաինայում հակամարտության սկսվելուց հետո, և 4,3 միլիոն ուկրաինացի քաղաքացի ժամանակավոր պաշտպանություն է ստացել ԵՄ-ում։ Իրանի պատերազմի վերաբերյալ Վլադիմիր Պուտինը «աջակցել է ռեժիմին» Թեհրանում»,- ասել է Բրունները։

Վերջիվերջո, հանձնակատարը եկել է այն եզրակացության, որ Ռուսաստանի նախագահը, ենթադրաբար, «իրականում դեպի Եվրոպա միգրացիայի ամենամեծ շարժիչ ուժն է»։