Պարզվել է երեկ Կոտայքի մարզում «Tesla»-ի, «Jeep»-ի, «Nissan»-ի և 2 «Ford Transit»-ների մասնակցությամբ վթարից հիվանդանոց տեղափոխվածների ինքնությունը

ՀՀ Քննչական կոմիտեի Կոտայքի մարզային քննչական վարչության Աբովյանի քննչական բաժնում նախաձեռնված քրեական վարույթի շրջանակում պարզվել է երեկ՝ մայիսի 5-ին, Իջևան-Սևան Երևան ավտոճանապարհի 126 կմ հատվածում տեղի ունեցած ավտովթարի հետևանքով հիվանդանոց տեղափոխվածների և վարորդների ինքնությունը։

Ինչպես հայտնում է ֆոտոլրագրող Գագիկ Շամշյանը, պարզվել է, որ «Ford Transit»-ներից մեկը վարել է Երևանի բնակիչ 53-ամյա Հարություն Մ.-ն, «Jeep Wrangler»-ը վարել է Երևանի բնակիչ 38-ամյա Արմեն Հ.-ն, մյուս «Ford Transit»-ը վարել է  Երևանի բնակիչ 44-ամյա Գարեգին Մ.-ն, «Nissan Sentra»-ն վարել է Երևանի բնակիչ 62-ամյա Գերասիմ Ն.-ն, իսկ «Tesla»-ն վարել է Երևանի բնակիչ 19-ամյա Արմեն Դ.-ն։Վթարի հետևանքով վարորդներից Արմեն Դ.-ն, Գերասիմ Ն․-ն և «Nissan Sentra»-ի ուղևորներ՝ Գեղարքունիքի մարզի բնակիչներ 25-ամյա Շիրակ Դ․-ն, 24-ամյա Վաչե Ա․-ն, 28-ամյա Կարեն Մ․-ն և Երևանի բնակիչ 20-ամյա Աշոտ Ն․-ն մարմնական վնասվածքներով տեղափոխվել են տարբեր հիվանդանոցներ։

Ֆոտոլրագրողը հայտնում է, որ վիրավորներից մեկի ձեռքը ամպուտացվել է և ձեռքի կտրված հատվածը արագ տեղափոխվել են Հերացու անվան թիվ 1 համալսարանական հիվանդանոց։

Ինչպես ավելի վաղ դեպքի վայրից հայտնել էր ֆոտոլրագրողը, երեկ՝ մայիսի 5-ին, խոշոր ու շղթայական ավտովթար էր տեղի ունեցել Կոտայքի մարզում։ Ժամը 15։10-ի սահմաններում Իջևան-Սևան-Երևան ավտոճանապարհի 126 կմ հատվածում բախվել էին «Tesla» մակնիշի, «Jeep Wrangler» մակնիշի, «Nissan Sentra» մակնիշի և 2 «Ford Transit» մակնիշի ավտոմեքենաները։

Վթարի հետևանքով, ըստ դեպքի վայրում  հավաքված քաղաքացիների, 7 հոգի տարբեր աստիճանի մարմնական վնասվածքներով տեղափոխվել էին մի մասը՝ Աբովյանի, մի մասը՝ Երևանի տարբեր հիվանդանոցներ։

Վիրավորներին առաջինը օգնության էին հասել քաղաքացիները և օպերատիվորեն ժամանած ՀՀ ներքին գործերի նախարարության փրկարար ծառայության հատուկ նշանակության փրկարարական աշխատանքների իրականացման կենտրոնի հատուկ փրկարարներն ու Աբովյանի հրշեջ-փրկարարական ջոկատի փրկարարները՝ ՀՆՓԱԿ-ի հատուկ ջոկատի հրամանատար Վահե Պետրոսյանի և Աբովյանի ՀՓՋ-ի 4-րդ խմբի պետ՝ Հրաչ Մանուկյանի գլխավորությամբ։

Վիրավորներից մի քանիսին փրկարարները մոտեցրել էին օպերատիվորեն ժամանած շտապօգնության ավտոմեքենաներին, ապա հոսանքազրկել էին ավտոմեքենաները և դադարեցրել երկուսի դիզվառելիքի արտահոսքը։

Բախման հետևանքով «Ford Transit»-ներից մեկը գլխիվայր շրջվել էր, իսկ «Jeep Wrangler»-ն էլ հայտնվել էր բաժանարար գոտու կանաչ գազոնում։

Օպերատիվորեն ժամանել էին ՀՀ ՆԳՆ ոստիկանության Պարեկային ծառայության Կոտայքի մարզի գումարտակի 2-րդ վաշտի 1-ին դասակի պարեկները՝ գումարտակի հրամանատար Ալբերտ Մարտիրոսյանի, գումարտակի հրամանատարի տեղակալ Վահագն Կարապետյանի, գումարտակի ծառայության ավագ տեսուչ, օրվա պատասխանատու Արտակ Ասատրյանի, գումարտակի ծառայության տեսուչ Կառլեն Բաղյանի և վաշտի հրամանատար Սահակ Գալստյանի գլխավորությամբ։

Ժամանել էին նաև ՀՀ ՆԳՆ ոստիկանության համայնքային ոստիկանության գլխավոր վարչության Կոտայքի բաժնի հերթապահ խումբը՝ ավագ համայնքային ոստիկան Գրիգոր Գալստյանի գլխավորությամբ։

Պարեկներն ու համայնքային ոստիկանները սահմանազատել էին տարածքը։

Դեպքի մասին ոստիկանության Կոտայքի բաժնից տեղեկությունը փոխանցվել էին ՀՀ Քննչական կոմիտեի Կոտայքի մարզային քննչական վարչության Աբովյանի քննչական բաժին, որտեղից ժամանել էր քննչական խումբը՝ վարչության պետ Հովհաննես Չալաբյանի, վարչության պետի տեղակալներ Աշոտ Մելքումյանի, Սերգեյ Ավագյանի, Աբովյանի քննչական բաժնի պետ Գոռ Դավթյանի, բաժնի պետի տեղակալ Տիգրան Բաղյանի և օրվա պատասխանատու հերթապահ քննիչի գլխավորությամբ։