Արտաքին հետախուզության ծառայությունն օրենքով հնարավորություն կունենա ԱԱԾ-ից անկախ գաղտնալսումներ կատարել

«Օրենքով կարգավորված չեն ծառայությունում ծառայողին բարձր, հավասար կամ ցածր պաշտոնի փոխադրելու կամ նշանակելու հարաբերությունները»,-ԱԺ-ում զեկուցեց Արտաքին հետախուզության ծառայության պետ Քրիստիննե Գրիգորյանը՝ զեկուցելով ««Արտաքին հետախուզական գործունեության և արտաքին հետախուզության ծառայության մասին» օրենքում փոփոխություններ և լրացումներ կատարելու մասին» օրենքի նախագիծը՝ կից օրենսդրական փաթեթով:

Նրա խոսքով, նախագծի ընդունման արդյունքում ակնկալվում է կարգավորել օրենքը կիրառելու ընթացքում ի հայտ եկած բացերը, բացահայտված խնդիրներին տալ իրավական կարգավորում և բացառել գործնականում առաջացող կամ հնարավոր համարվող խնդիրները։

Գրիգորյանը նշեց, որ ԱՀԾ ծառայողներին հատկացվող արձակուրդների շարքում առաջարկվում է ավելացնել նաև հայրության նպատակային արձակուրդի տեսակը, ինչպես նաև՝ մինչև 3 տարեկան երեխայի խնամքի արձակուրդ հատկացնել նաև ծառայության տղամարդ ծառայողներին:

Նա նշեց, որ օրենքի 13-րդ հոդվածի համաձայն  թույլատրված է զենք ու հատուկ միջոց ունենալ, իսկ նախագծով առաջարկվում է հստակեցնել ծառայության ծառայողի կողմից ֆիզիկական ուժի, զենքի և հատուկ միջոցների կիրառման դեպքերը, սահմանել լիազորող նորմ Արտաքին հետախուզության ծառայության պետի կողմից զենքի և հատուկ միջոցների ցանկը, դրանց հաշվառման, հատկացման, կրման և պահելու կարգը:

«Միաժամանակ, հաշվի առնելով այլ մարմիններում կիրառվող փորձը և Արտաքին հետախուզության ծառայությունում իրականացվող ծառայությանը բնորոշ առանձնահատկությունները՝ առաջարկվում է ծառայողին հատկացնել 15-25, և 25 ու ավելի տարի ծառայելու դիմաց  լրացուցիչ արձակուրդ՝ ծառայությունում երկարատև ստաժի առկայության ու դրան համարժեք հանգստի ժամանակի ապահովման անհրաժեշտությամբ  պայմանավորված»,-ասաց Գրիգորյանը, հավելելով, որ նախատեսում են համակարգի ծառայողներին նշանակված տույժը ժամկետից շուտ հանել ինչը նախատեսված չէ օրենքով։

«Առաջարկվում է ծառայության պետի և տեղակալի պաշտոնում, որոնք Հանրային ծառայության օրենքով ծառայության պաշտոն չեն այլ վարչական, սահմանվի պահանջ, որ այդ անձինք կարող են լինել միայն ՀՀ քաղաքացիներ»,- ասաց Արտաքին հետախուզության ծառայության պետը և հավելեց.

«Մենք որպես ծառայություն  իրավունք ունենք ի թիվս այլ գործողությունների, իրականացնել հեռախոսային հաղորդակցության վերահսկում և այս փաթեթով նախատեսվում է օրենքվ թուլատրելի դարձնել ծառայության կողմից թվային, այդ թվում հեռախոսայոին հաղորդակցության օպերատիվ հետախուզական միջոցառումը ինքնուրույն և սեփական օպերատիվ տեխնիկական ենթակառուցվածքներով կատարելու հնարավորությունը»։