Օրենսդրական հստակեցումներ․ քննարկվել է «Նախադպրոցական կրթության մասին» օրենքի փոփոխությունը (տեսանյութ)

Ազգային ժողովում քննարկվել է «Նախադպրոցական կրթության մասին» օրենքում լրացում և փոփոխություններ կատարելու մասին և կից ներկայացված օրենքների նախագծերի փաթեթը երկրորդ ընթերցմամբ և ամբողջությամբ ընդունելու հարցը:

Ներկայացնելով նախագիծը՝ ԿԳՄՍ նախարար Ժաննա Անդրեասյանը նշել է՝ օրենսդրական փաթեթի հիմնական նպատակը նախադպրոցական կրթության հնարավորությունների ընդլայնումն է։

Մասնավորապես՝ նախատեսվում է, որ երեխաները նախակրթարան հաճախելու հնարավորություն կունենան ոչ թե 5 տարեկանից, ինչպես գործող կարգավորումներով է, այլ 4 տարեկանից։ Իսկ այն բնակավայրերում, որտեղ գործում է միայն մեկ նախակրթարանային ծառայություն, երեխաները հնարավորություն կունենան հաճախել նաև 3 տարեկանից։

Բացի այդ՝ միասնական ստանդարտ է սահմանվում կրթական հաստատությունների ղեկավարման իրավունքի հավաստագրման գործընթացի համար։ «Սա հնարավորություն է տալիս ընդլայնել մրցակցությունը և կադրերի ընտրության հարցում կատարել ավելի մրցակցային ընտրություն, ինչն էլ էական ազդեցություն կունենա ուսումնական հաստատությունների գործունեության որակի վրա»,- ներկայացրել է ԿԳՄՍ նախարարը։

Ժաննա Անդրեասյանի խոսքով՝ առաջինից երկրորդ ընթերցման փուլում իրականացվել են մի շարք փոփոխություններ, հիմնականում՝ խմբագրական բնույթի։ Կատարվել է նաև մեկ էական լրացում, որը վերաբերում է «Հանրակրթության մասին» օրենքի 31-րդ հոդվածին և կոչված է հստակեցնելու մեկ լիազոր մարմին ունենալու դրույթը։ Այդ դրույթն արդեն իսկ քվեարկվել է Ազգային ժողովի կողմից և հանդիսանում է գործող կարգավորում։

«Այս տարվա սեպտեմբերից մարզային բոլոր դպրոցներն անցնելու են ԿԳՄՍ նախարարության ենթակայության ներքո։ Այդ իսկ պատճառով առաջինից երկրորդ ընթերցման ժամանակ կատարվել են նաև որոշ փոփոխություններ մարզպետի աշխատակազմերի և նախարարության գործառույթների հստակեցման վերաբերյալ, որպեսզի սեպտեմբերից գործընթացը կազմակերպվի անխափան և սահուն»,- ներկայացրել է Ժաննա Անդրեասյանը:

ԱԺ ԳԿՄՍԵՍ հարցերի մշտական հանձնաժողովի դրական եզրակացությունը ներկայացրել է հանձնաժողովի նախագահի տեղակալ Թագուհի Ղազարյանը: