Բժիշկը նշել է դեմենցիայի ռիսկը նվազեցնելու ոչ ակնհայտ միջոց

Բժիշկ Ամիր Խանը հայտարարել է, որ լավ ֆիզիկական վիճակը կարող է զգալի դեր ունենալ դեմենցիայի զարգացման ռիսկի նվազեցման հարցում։ Այդ մասին նա խոսել է Daily Mirror-ի հետ։

Նրա խոսքով՝ սովորաբար դեմենցիայի կանխարգելումը կապում են ընթերցանության, մտավոր վարժությունների և գլուխկոտրուկների լուծման հետ, սակայն վերջին հետազոտությունները ցույց են տալիս, որ ֆիզիկական ակտիվությունն ու ընդհանուր մարմնական վիճակը նույնպես կարևոր նշանակություն ունեն։

Մասնագետը նշել է, որ UK Biobank-ի տվյալներով՝ լավ ձեռքի սեղմման ուժ ունեցող, լավ քնող և ավելի քիչ նստակյաց կենսակերպ վարող մարդկանց մոտ դեմենցիայի զարգացման ռիսկը եղել է մինչև 57 տոկոսով ավելի ցածր՝ համեմատած ավելի պասիվ կենսակերպ ունեցող մարդկանց հետ։

Բժիշկը ընդգծել է, որ ակտիվ կյանք սկսելու համար երբեք ուշ չէ․ նույնիսկ պարզ ֆիզիկական գործողությունները՝ նստացատկեր, առաձգական ժապավենով վարժություններ, աստիճաններով բարձրանալը կամ գնումների պայուսակ կրելը, կարող են օգտակար լինել ոչ միայն մարմնի, այլ նաև ուղեղի առողջության համար։

Միաժամանակ մասնագետները հիշեցնում են, որ դեմենցիայի ռիսկի վրա ազդում են բազմաթիվ գործոններ, և միայն մեկ ցուցանիշով այն կանխատեսել հնարավոր չէ։