Նշվել է վահանաձև գեղձի համար ամենաօգտակար ընկույզը

Բժշկական կանխարգելման մասնագետ և նուտրիցիոլոգ Յուլիա Սմիրնովան հայտնել է, որ վահանաձև գեղձի առողջությունն աջակցելու համար օգտակար է սննդակարգում ներառել բրազիլական ընկույզ։ Այդ մասին նա խոսել է ՌԻԱ Նովոստիի հետ զրույցում։

Մասնագետի խոսքով՝ օրական ընդամենը 2–4 հատ բրազիլական ընկույզը կարող է ապահովել սելենի անհրաժեշտ քանակը։ Նա պարզաբանել է, որ առանց սելենի օրգանիզմը չի կարող լիարժեք յուրացնել յոդը։

Սմիրնովան նաև նշել է, որ յոդ և սելեն պարունակում են ձուն և կաթնամթերքը։

Բացի այդ, վահանաձև գեղձի բնականոն աշխատանքի համար կարևոր են նաև օմեգա-3 ճարպաթթուները, որոնք առկա են յուղոտ ձկներում, կտավատի յուղում և ընկույզում, ինչպես նաև վիտամին D3-ը, որի աղբյուրներն են ձվի դեղնուցը, ձկան լյարդը և յուղոտ ձուկը։

Նրա խոսքով՝ կարևոր դեր ունեն նաև մագնեզիումը, որը պարունակվում է դդմի սերմերում, սպանախում, հնդկացորենում և կակաոյում, ինչպես նաև կալցիումը, որը կարելի է ստանալ քունջութից, պինդ պանիրներից, կաթնաշոռից և նուշից։ Վահանաձև գեղձի աշխատանքի համար անհրաժեշտ են նաև ցինկը, A, E և B խմբի վիտամինները։

Միաժամանակ մասնագետը ընդգծել է, որ յոդի դեֆիցիտի կամ Հաշիմոտոյի հիվանդության դեպքում սննդամթերքը չի կարող փոխարինել դեղորայքային բուժմանը, իսկ յոդի ավելցուկը կարող է նպաստել վահանաձև գեղձի աուտոիմուն հիվանդությունների զարգացմանը։