Կարելի է ասել՝ չենք ունեցել ԿԸՀ. Խուդոյան

Սահմանադրական դատարանում հունիսի 7-ի ԱԺ արտահերթ ընտրությունների արդյունքները վիճարկող քաղաքական ուժերի դիմումների քննության ընթացքում «Հայաստան» դաշինքի ներկայացուցիչ Հովհաննես Խուդոյանը խիստ քննադատության ենթարկեց Կենտրոնական ընտրական հանձնաժողովի գործունեությունը։

Նրա խոսքով՝ ՍԴ-ում շուրջ հինգ օր տևած քննարկումները ցույց են տվել, որ ընտրողներն ինքնուրույն կարող են եզրակացնել՝ ԿԸՀ-ն չի կատարել իր հիմնական առաքելությունը և չի ապահովել քաղաքացիների հավասար ու ազատ ընտրական իրավունքի լիարժեք իրացումը։ Խուդոյանի գնահատմամբ՝ հանձնաժողովը փաստացի անգործություն է դրսևորել ընտրական գործընթացների ընթացքում։

«Հայաստան» դաշինքի ներկայացուցիչ Տաթև Սողոյանն էլ նշեց, որ ԿԸՀ-ն ընտրական գործընթացների շրջանակում չի իրականացրել որևէ վարչական վարույթ՝ այդ ցուցանիշը գնահատելով զրոյական։

Շարունակելով իր ելույթը՝ Հովհաննես Խուդոյանը հարց բարձրացրեց ԿԸՀ-ի գործառույթների արդյունավետության վերաբերյալ՝ նշելով, որ եթե հանձնաժողովի դերը սահմանափակվում է միայն ընտրական միջոցառումների կազմակերպմամբ, ապա դրա գոյության նպատակահարմարությունը կասկածի տակ է դրվում։ Նա նույնիսկ հումորային դիտարկում արեց՝ ասելով, որ այդ դեպքում պետական բյուջեից հատկացվող միջոցներն ավելի արդյունավետ կլիներ տրամադրել միջոցառումների կազմակերպմամբ զբաղվող այլ կառույցի։

Խուդոյանը նաև պնդեց, որ ընտրությունների արդյունքների հնարավոր խախտումները կարելի է հիմնավորել պարզ թվաբանական հաշվարկներով։ Նրա խոսքով՝ խոսքը ոչ թե ենթադրությունների կամ գնահատականների, այլ կոնկրետ թվերի, ձայների հաշվարկի և ֆինանսական ծախսերի վերլուծության մասին է, ինչը, ըստ նրա, հնարավորություն է տալիս փաստարկված եզրակացություններ անել։