«Պետական շահը մի կողմ է դրել». Հայկ Սարգսյանը՝ Անդրանիկ Քոչարյանի մասին

ԱԺ «Քաղաքացիական պայմանագիր» խմբակցության պատգամավոր Հայկ Սարգսյանը հայտարարել է, որ դիմելու է Ազգային ժողովի բոլոր պատգամավորներին և հանրությանը՝ աջակցելու զինվորական ծառայությունից խուսափելու գործերով կալանքի տակ գտնվող մի խումբ քաղաքացիների խնդրի լուծմանը։

Նրա խոսքով՝ ազգությամբ եզդի ՀՀ մի քաղաքացի 2025 թվականին, 27 տարին լրանալուց հետո, վերադարձել է Հայաստան՝ օրենքով նախատեսված կարգով իր պարտավորությունները կարգավորելու նպատակով, սակայն գործող կարգավորումների պատճառով չի կարողացել օգտվել այդ հնարավորությունից և այժմ գտնվում է անազատության մեջ։

Սարգսյանը հիշեցրել է, որ 2026 թվականի հունվարին օրենսդրական փոփոխություններ են կատարվել, որոնց արդյունքում 27 տարին լրացած քաղաքացիները կարող են վերադառնալ Հայաստան, ծառայել կամ օրենքով սահմանված վճարումն իրականացնել և ազատվել քրեական պատասխանատվությունից։ Սակայն մինչ այդ կալանքի տակ հայտնված անձինք չեն կարողացել օգտվել այդ հնարավորությունից։

Պատգամավորի տվյալներով՝ ներկայում նման իրավիճակում գտնվում են ևս 16 երիտասարդներ։

Այս խնդրի լուծման նպատակով նա մշակել է օրինագիծ, որով առաջարկվում է նույն հնարավորությունը տրամադրել նաև կալանքի տակ գտնվող անձանց։ Սարգսյանի խոսքով՝ կառավարությունը նախագծին դրական եզրակացություն է տվել, սակայն այն չի ընդգրկվել արտահերթ նիստերի օրակարգում։ Նա պնդել է, որ դրա պատճառը ԱԺ պաշտպանության և անվտանգության հարցերի մշտական հանձնաժողովի նախագահ Հովհաննես Քոչարյանի հետ ունեցած տարաձայնություններն են՝ նշելով, որ վերջինս դեմ է արտահայտվել նախաձեռնությանը։

Ըստ Սարգսյանի՝ Քոչարյանը պետական շահը դրել է մի կողմ և ամբիցիայով ասել է՝ ես դեմ եմ քո նախագծին։

Հայկ Սարգսյանը հայտնել է, որ նախաձեռնել է պատգամավորների ստորագրահավաք՝ արտահերթ նիստ հրավիրելու և օրինագիծը քննարկելու նպատակով։ Նրա համոզմամբ՝ նախաձեռնության ընդունումը հնարավորություն կտա կալանքի տակ գտնվող երիտասարդներին ծառայության միջոցով մարել իրենց պարտավորությունները և ազատվել հետագա պատժի կրումից՝ վերականգնելով արդարության սկզբունքը։

Պատգամավորը նաև կոչ է արել քաղաքացիներին աջակցել նախաձեռնությանը և դիմել պատգամավորներին՝ հորդորելով միանալ ստորագրահավաքին, որպեսզի հարցը քննարկվի մինչև գործող գումարման Ազգային ժողովի լիազորությունների ավարտը։