Հայկ Սարգսյան․ «Հնարավոր է՝ հետո էլ ընդհանրապես չուզեմ վերադառնալ»

ԱԺ «Քաղաքացիական պայմանագիր» խմբակցության պատգամավոր Հայկ Սարգսյանը հայտարարել է, որ պատգամավորական գործունեությունն ավարտելուց հետո առայժմ պետական պաշտոն զբաղեցնելու մտադրություն չունի։

Հուլիսի 1-ին Ազգային ժողովում լրագրողների հետ զրույցում նա նշել է, որ առաջիկայում ցանկանում է դադար վերցնել և հանգստանալ՝ ամփոփելով վերջին ութ տարիների աշխատանքը խորհրդարանում։

«Ութ տարի աշխատել եմ Ազգային ժողովում, հանդես եկել տասնյակ օրենսդրական նախաձեռնություններով, որոնցից շատերը կյանքի են կոչվել։ Իմ կատարած աշխատանքից գոհ եմ և այժմ ցանկանում եմ մի փոքր հանգստանալ»,- ասել է պատգամավորը։

Անդրադառնալով հարցին, թե արդյոք իշխանության կողմից իրեն որևէ պաշտոն զբաղեցնելու առաջարկ է արվել, Սարգսյանը պատասխանել է, որ նման քննարկումներ չեն եղել, քանի որ ինքն այդպիսի ցանկություն չի հայտնել։

Պատգամավորը նաև ընդգծել է, որ այս փուլում ընդդիմադիր գործունեությամբ զբաղվելու մտադրություն չունի։

Խոսելով Ազգային ժողովի նախագահի պաշտոնում Ռուբեն Ռուբինյանի առաջադրման մասին՝ Սարգսյանը նշել է, որ հարգանքով է վերաբերվում կուսակցության վարչության որոշմանը և հաջողություն է մաղթում նորանշանակ ղեկավարին։ Նրա խոսքով՝ որևէ պատճառ չունի կասկածելու, որ Ռուբինյանը կարող է արդյունավետ ղեկավարել խորհրդարանը։

Հայկ Սարգսյանը նաև վստահեցրել է, որ Ալեն Սիմոնյանի հետ որևէ լարվածություն չունի, իսկ հարաբերությունները շարունակում են մնալ բնականոն։

Հարցին, թե որտեղ կտեսնեն իրեն պատգամավորական լիազորությունների ավարտից հետո, նա կատակով պատասխանել է՝ «Երևանի փողոցներում»՝ հավելելով, որ առայժմ չի պատրաստվում զբաղվել հանրային քաղաքական գործունեությամբ և նախընտրում է ժամանակ հատկացնել հանգստին։

Միաժամանակ պատգամավորը նշել է, որ շարունակում է մնալ «Քաղաքացիական պայմանագիր» կուսակցության անդամ և կուսակցությունից հեռանալու որևէ մտադրություն չունի։