Օրբելյան․ ԲՀԿ-ի մանդատների հարցը պետք է վերանայվի

Սահմանադրական դատարանում հունիսի 7-ին կայացած ԱԺ ընտրությունների արդյունքները վիճարկող 7 քաղաքական ուժերի դիմումների հիման վրա միացված գործի քննության ընդմիջման ժամանակ ԲՀԿ ներկայացուցիչ, փաստաբան Արամ Օրբելյանը լրագրողների հետ զրույցում ներկայացրել է իրենց հիմնական պահանջները։

Նրա խոսքով՝ կողմը առաջադրում է երկու հիմնական պահանջ։ Առաջինը՝ ընտրությունների արդյունքները ճանաչել անվավեր, որի դեպքում, ըստ նրա, ողջ երկրում պետք է անցկացվի վերաքվեարկություն։

Օրբելյանի գնահատմամբ՝ եթե նման որոշում չկայացվի, ապա անհրաժեշտ է կիրառել մանդատների բաշխման նոր կարգ։

Նա նշել է, որ այդ տարբերակով Սահմանադրական դատարանը կարող է սահմանել, որ ԲՀԿ-ն, հաղթահարելով 4 տոկոսանոց շեմը, ստանա համապատասխան թվով մանդատներ՝ մոտ 5 տեղ խորհրդարանում։ Նրա խոսքով՝ այդ դեպքում մանդատների վերաբաշխման արդյունքում որոշ քանակով տեղեր կպակասեն իշխող ուժից, ինչպես նաև հնարավոր է փոփոխություն տեղի ունենա այլ քաղաքական ուժերի մանդատների հաշվին։

Օրբելյանը հավելել է, որ նման մոտեցումը հնարավորություն կտա ԲՀԿ-ին խորհրդարանում ներկայացնել այն ավելի քան 58 հազար 500 քաղաքացիների ձայները, որոնք, ըստ նրա, աջակցություն են ցուցաբերել կուսակցությանը։