Կառավարությունը հաստատել է ջերմատնային տնտեսությունների վարկերի տոկոսադրույքների սուբսիդավորման ծրագիրը

ՀՀ կառավարությունը հաստատել է ջերմատնային տնտեսություններին տրամադրվող վարկերի տոկոսադրույքների սուբսիդավորման ծրագիրը, որի նպատակն է աջակցել ոլորտի տնտեսավարողներին և ապահովել բանջարեղենի, հատապտուղների ու ծաղիկների արտադրության շարունակականությունը։

 

Ծրագրից կարող են օգտվել 1 հա և ավելի մակերեսով ջերմատնային տնտեսություն տնօրինող իրավաբանական անձինք և անհատ ձեռնարկատերերը, որոնք 2026 թվականի ընթացքում արտադրել և իրացրել են գյուղատնտեսական արտադրանք։ Ծրագրին մասնակցելու համար շահառուները կարող են դիմել ֆինանսական կառույցներին մինչև 2026 թվականի սեպտեմբերի 1-ը։

 

 Յուրաքանչյուր 1 հա ջերմատան համար տրամադրվող վարկի առավելագույն չափը սահմանվել է 100 մլն դրամ։ Վարկերը կտրամադրվեն մինչև 14 տոկոս տարեկան փաստացի տոկոսադրույքով, որի 12 տոկոսային կետը կսուբսիդավորվի պետության կողմից։ Վարկի մարման առավելագույն ժամկետը 18 ամիս է, այդ թվում՝ 12 ամիս արտոնյալ ժամանակահատված։

 

Վարկային միջոցները պետք է ծախսվեն անկանխիկ՝ հետևյալ ուղղություններով՝

1) սպառված գազի, էլեկտրաէներգիայի և ջրի գծով վճարներ,

2) պետական կամ համայնքի բյուջե հարկեր և պարտադիր վճարումներ,

3) աշխատավարձ և դրան հավասարեցված վճարումներ,

4) պարարտանյութերի, սերմերի, սածիլների ձեռքբերման (ձեռքբերումը պետք է իրականացվի ավելացված արժեքի հարկ վճարող կազմակերպություններից) վճարումներ։