Ամերիկահայ ըմբիշը չի մասնակցի Բաքվում կայանալիք աշխարհի առաջնությանը

ԱՄՆ-ի հավաքականի անդամ, 2026 թվականի ԱՄՆ-ի բաց առաջնության հաղթող Գալուստ Թորոսյանը հայտարարել է, որ չի մասնակցի Ադրբեջանում անցկացվող մինչև 17 տարեկանների ըմբշամարտի աշխարհի առաջնությանը։ Նրա խոսքով՝ որոշումը պայմանավորված է անվտանգային մտահոգություններով՝ ելնելով իր ազգությունից։

«Այս որոշումը պայմանավորված չէ վախով, այլ բխում է սկզբունքներից և պատասխանատվությունից։ Ոչ մի մարզիկ չպետք է կանգնի իր երազանքի և սեփական անվտանգության միջև ընտրության առաջ՝ իր ազգային կամ կրոնական պատկանելության պատճառով»,- նշել է Թորոսյանը։ Թորոսյանն ընդգծել է, որ աշխարհի առաջնությունից հրաժարվելն իր ամենադժվար որոշումներից է։

Նա նշել է, որ չի կարող անտեսել Ադրբեջանում հայկական քրիստոնեական եկեղեցիների և պատմամշակութային ժառանգության ոչնչացման, հայ գերիների նկատմամբ վերաբերմունքի, ինչպես նաև հայերի դեմ հնչող թշնամական հռետորաբանության ֆոնին իր և ընտանիքի անվտանգության հետ կապված ռիսկերը։

Մարզիկը նաև հայտնել է, որ մինչև որոշումը մի քանի անգամ դիմել է Ըմբշամարտի միջազգային կառույցի (UWW) ղեկավարությանը՝ հետաքրքրվելով, թե ի՞նչ միջոցներ են ձեռնարկվելու իր անվտանգությունն ապահովելու համար՝ հաշվի առնելով նաև ԱՄՆ պետդեպարտամենտի՝ Ադրբեջան ուղևորությունների վերաբերյալ նախազգուշացումը։ Նրա խոսքով՝ այդ նամակներն անպատասխան են մնացել, այդ թվում՝ UWW մարզիկների հանձնաժողովի նախագահ Արսեն Ջուլֆալակյանին ուղղված։

Նա հավելել է, որ շարունակելու է մարզվել և ապագայում կրկին ներկայացնել ԱՄՆ-ն միջազգային մրցաշարերում՝ ընդգծելով, որ հպարտ է իր հայկական և քրիստոնեական ինքնությամբ։ Մ17 տարեկանների աշխարհի առաջնությունը կանցկացվի հուլիսի 27-ից օգոստոսի 2-ն Ադրբեջանի մայրաքաղաք Բաքվում։ Թորոսյանն ընդգրկվել էր ԱՄՆ հունահռոմեական ոճի ըմբշամարտի հավաքականում և, ինչպես սպասվում էր, պիտի ներկայացներ ԱՄՆ հավաքականը։