ԱՄՆ նախկին ԿՀՎ տնօրենը նշել է ժամանակակից պատերազմում հաղթելու երեք հիմնական պայման

ԱՄՆ Կենտրոնական հետախուզական վարչության (ԿՀՎ) նախկին տնօրեն, գեներալ Դևիդ Պետրեուսը հայտարարել է, որ Վաշինգտոնը պետք է վերանայի իր պաշտպանական քաղաքականությունը և դասեր քաղի Ուկրաինայի հակամարտությունից՝ ժամանակակից պատերազմներին ավելի արդյունավետ պատրաստվելու համար։ Այդ մասին նա գրել է The Wall Street Journal-ում հրապարակված հոդվածում։

Պետրեուսի գնահատմամբ՝ ապագա պատերազմների ելքը դժվար թե որոշվի մեկ տեխնոլոգիական առավելությամբ, մեկ տեսակի սպառազինությամբ կամ մեկ խոշոր ռազմական գործողությամբ։ Նրա խոսքով՝ Ուկրաինայի պատերազմը ցույց է տվել ճկուն մարտավարության և անօդաչու համակարգերի աճող նշանակությունը։

Նախկին ԿՀՎ տնօրենը առանձնացրել է երեք հիմնական դաս։ Առաջինը՝ միայն բարձր տեխնոլոգիական զենքը բավարար չէ․ արդյունավետ ռազմական համակարգը պետք է հիմնված լինի անօդաչու սարքերի, հրթիռային միջոցների և պաշտպանական արդյունաբերության միասնական փոխգործակցության վրա։ Երկրորդը՝ ազգային ենթակառուցվածքների պաշտպանությունը դարձել է ռազմավարական առաջնահերթություն, քանի որ դրանք այլևս չեն համարվում ապահով թիկունք և կարող են դառնալ առաջնային թիրախներ։ Երրորդը՝ ժամանակակից պատերազմներում վճռորոշ նշանակություն ունի բանակի արագ հարմարվելու և մարտավարությունը կարճ ժամանակում փոխելու կարողությունը։

Պետրեուսը նախկինում ևս նշել էր, որ ապագայի պատերազմների բնույթը մեծապես պայմանավորված կլինի անօդաչու թռչող համակարգերի լայնածավալ կիրառմամբ։