Լատվիայի օլիմպիական կոմիտեն քննադատել է ռուս մարզիկների վերադարձի վերաբերյալ ՄՕԿ-ի որոշումը

Լատվիայի ազգային օլիմպիական կոմիտեն քննադատել է Միջազգային օլիմպիական կոմիտեի (ՄՕԿ) որոշումը, որը վերաբերում է ռուս և բելառուս մարզիկների միջազգային մրցումներին վերադարձին։ Այդ մասին հաղորդվում է կազմակերպության պաշտոնական հայտարարության մեջ։

Կոմիտեն դատապարտել է ՄՕԿ-ի այն որոշումները, որոնք ուղղված են Ռուսաստանի և Բելառուսի օլիմպիական կոմիտեների կարգավիճակի վերականգնմանը։ Հայտարարության մեջ նշվում է, որ Լատվիայի օլիմպիական կոմիտեն ակնկալում է, որ միջազգային մարզական ֆեդերացիաները կմշակեն մեխանիզմներ, որոնք կկանխեն Ռուսաստանի և Բելառուսի մարզիկների մասնակցությունը միջազգային մրցումներին։

Ավելի վաղ նմանատիպ հայտարարությամբ հանդես էր եկել նաև Ուկրաինայի ազգային օլիմպիական կոմիտեն՝ հայտնելով, որ կտրականապես համաձայն չէ ՄՕԿ-ի գործադիր խորհրդի որոշման հետ։ Ուկրաինական կողմի գնահատմամբ՝ այն վաղաժամ է, բավարար հիմնավորում չունի և ընդունվել է՝ առանց առկա հանգամանքները լիարժեք հաշվի առնելու։

Հիշեցնենք, որ ՄՕԿ-ը չեղարկել է միջազգային մարզական ֆեդերացիաներին և մրցաշարերի կազմակերպիչներին նախկինում տրված այն հանձնարարականները, որոնք սահմանափակում էին ռուս մարզիկների մասնակցությունը միջազգային մրցումներին։ Բացի այդ, Ռուսաստանի օլիմպիական կոմիտեի անդամակցությունը ժամանակավորապես վերականգնվել է։