Թրամփի թիմը միջանկյալ ընտրություններից առաջ շեշտը դնում է հակակոմունիստական հռետորաբանության վրա

ԱՄՆ նախագահ Դոնալդ Թրամփի քաղաքական թիմը միջանկյալ ընտրություններից առաջ ակտիվորեն փորձարկում է հակակոմունիստական ուղերձը՝ փորձելով այն դարձնել հանրապետականների հիմնական նախընտրական թեման։ Այդ մասին հայտնում է Reuters-ը։

Գործակալության տվյալներով՝ Թրամփի թիմի անցկացրած ֆոկուս-խմբերի նախնական արդյունքները ցույց են տալիս, որ նման հռետորաբանությունը զգալիորեն ոգևորում է նախագահի հիմնական ընտրազանգվածին և կարող է բարձրացնել ընտրություններին քիչ մասնակցող հանրապետականների ակտիվությունը։ Սակայն նույն ուղերձը զգալի ազդեցություն չի թողնում անկախ ընտրողների և երիտասարդների շրջանում, որոնք Սառը պատերազմի ժամանակաշրջանը չեն ապրել։

Reuters-ի հաշվարկով՝ հունիսի 23-ից հուլիսի 6-ն ընկած ժամանակահատվածում Թրամփը իր հրապարակային ելույթներում 81 անգամ օգտագործել է «կոմունիզմ» բառը՝ մի շարք առաջադեմ դեմոկրատ քաղաքական գործիչների բնութագրելով որպես «արմատական, աթեիստ կոմունիստներ»։ Հանրապետականները փորձում են այս թեմայով ուշադրությունը տեղափոխել տնտեսական խնդիրներից՝ ներկայացնելով Դեմոկրատական կուսակցության ձախ թևին որպես ծայրահեղական ուժ։

Սպիտակ տան խոսնակ Օլիվիա Ուելսը հայտարարել է, որ «Դեմոկրատների կողմից սոցիալիզմի և կոմունիզմի ընդունումը գոյաբանական սպառնալիք է երկրի համար», և ընդգծել, որ Թրամփը շարունակելու է հակադրել այդ մոտեցումները իր «America First» («Ամերիկան՝ առաջինը») քաղաքականությանը։

Միևնույն ժամանակ, Դեմոկրատական կուսակցության ներկայացուցիչները մեղադրում են հանրապետականներին իրական տնտեսական խնդիրներից ուշադրությունը շեղելու մեջ։ Ներկայացուցիչների պալատի դեմոկրատների նախընտրական հանձնաժողովի ղեկավար Սյուզան ԴելԲենեն հայտարարել է, որ Հանրապետական կուսակցությունը դիմում է «հուսահատ հարձակումների», որոնք չեն վերաբերում քաղաքացիների առօրյա տնտեսական խնդիրներին։