Բայրամով․ համաձայնագիրը պատրաստ է, սակայն կա մեկ պայման

Ադրբեջանն ավարտել է խաղաղության համաձայնագրի վերջնական մշակման աշխատանքների իր մասը։ Այդ մասին, ադրբեջանական ԱՊԱ գործակալության փոխանցմամբ, լրագրողների հետ զրույցում հայտարարել է Ադրբեջանի արտաքին գործերի նախարար Ջեյհուն Բայրամով։

Բայրամովի խոսքով՝ Վաշինգտոնում կայացած գագաթնաժողովի շրջանակում Հայաստանի և Ադրբեջանի միջև ստորագրվել է համատեղ հայտարարություն։

«Խաղաղության համաձայնագրի տեքստն արդեն նախաստորագրվել է և հասանելի է հանրությանը։ Ադրբեջանի մոտեցումն այս հարցում մնում է անփոփոխ։ Նախագահ Իլհամ Ալիևը ներկայացրել է պետության պաշտոնական դիրքորոշումը», - նշել է նա։

Ադրբեջանի ԱԳ նախարարը հերթական անգամ պնդել է, թե Հայաստանի Սահմանադրությունը պարունակում է Ադրբեջանի նկատմամբ տարածքային պահանջներ։ Նրա խոսքով՝ Բաքուն շարունակում է պնդել, որ այդ, իր ձևակերպմամբ, «խոչընդոտները» պետք է վերացվեն, ինչից հետո միայն հնարավոր կլինի ստորագրել խաղաղության համաձայնագիրը։