Բաքուն չի փոխում դիրքորոշումը․ խաղաղության համաձայնագիրը՝ Սահմանադրության փոփոխությունից հետո

Հայաստանի Սահմանադրությունից պետք է հանվեն Ադրբեջանի նկատմամբ տարածքային հավակնությունների վերաբերյալ դրույթները, որպեսզի հնարավոր դառնա խաղաղության համաձայնագրի ստորագրումը։ Այս մասին, ադրբեջանական լրատվամիջոցների փոխանցմամբ, լրագրողների հետ զրույցում հայտարարել է Ադրբեջանի արտաքին գործերի նախարար Ջեյհուն Բայրամով։

Բայրամովի խոսքով՝ Ադրբեջանն ավարտել է խաղաղության համաձայնագրի վերջնական համաձայնեցման ուղղությամբ իր աշխատանքի մասը։ Նա հիշեցրել է նաև, որ Վաշինգտոնում կայացած գագաթնաժողովի շրջանակում Հայաստանի և Ադրբեջանի միջև ստորագրվել է համատեղ հայտարարություն։

«Խաղաղության համաձայնագրի տեքստն արդեն նախաստորագրվել է և հասանելի է հանրությանը։ Ադրբեջանի դիրքորոշումն այս հարցում մնում է անփոփոխ։ Պետության պաշտոնական մոտեցումը ներկայացրել է նախագահ Իլհամ Ալիևը։ Մենք ակնկալում ենք, որ Հայաստանի Սահմանադրությունից կհեռացվեն Ադրբեջանի նկատմամբ տարածքային հավակնությունների մասին դրույթները։ Դրանից հետո հնարավոր կլինի ստորագրել խաղաղության համաձայնագիրը», - հայտարարել է Ադրբեջանի ԱԳ նախարարը։