«Ինտերը» պաշտոնապես ձեռք է բերել «Լացիոյի» դարպասապահ Իվան Պրովեդելին 3 միլիոն եվրոյով

Միլանի «Ինտերը» պաշտոնապես հայտարարել է Հռոմի «Լացիոյի» դարպասապահ Իվան Պրովեդելի տեղափոխության մասին։

32-ամյա իտալացի ֆուտբոլիստը միլանյան ակումբի հետ կնքել է 3 տարվա պայմանագիր, որը նախատեսված է մինչև 2029 թվականի հունիսի 30-ը։

Պրովեդելի խոսքով՝ այս տեղափոխությամբ նա իրականացրել է իր վաղեմի երազանքը՝ միանալով այն ակումբին, որի կազմում ժամանակին հանդես է եկել իր կուռքը՝ իտալական ֆուտբոլի լեգենդ Ֆրանչեսկո Տոլդոն։ Ըստ որոշ տեղեկությունների՝ դարպասապահի տրանսֆերի արժեքը կազմել է 3 միլիոն եվրո։

Հիշեցնենք, որ Պրովեդելը «Լացիոյի» կազմում հանդես էր գալիս 2022 թվականից։ 2022/23 մրցաշրջանում նա կրկնել էր Իտալիայի Ա Սերիայի ռեկորդը՝ մեկ մրցաշրջանում անցկացրած «չոր» խաղերի քանակով՝ 21 հանդիպում, հավասարվելով Ջանլուիջի Բուֆոնին և Մորգան Դե Սանկտիսին։ Նույն մրցաշրջանում նա ճանաչվել էր նաև առաջնության լավագույն դարպասապահ։

Պրովեդելը հայտնի է դարձել նաև Չեմպիոնների լիգայում գրանցած յուրահատուկ դրվագով։ 2023 թվականի սեպտեմբերի 19-ին՝ Մադրիդի «Ատլետիկոյի» դեմ խաղում, նա հանդիպման ավելացված ժամանակում գլխի հարվածով դարձել էր գոլի հեղինակ։

Դրանով նա դարձել էր պատմության մեջ ընդամենը երկրորդ դարպասապահը, որը եվրագավաթների գլխավոր մրցաշարում խաղային դրվագից գոլ է խփել։

Ավարտված մրցաշրջանում Պրովեդելը Իտալիայի առաջնությունում անցկացրել է 27 հանդիպում և բաց թողել 27 գնդակ։