«Պապայի արև, ձեր մեսիջները չենք նայում». Փաշինյանը՝ քաղաքացիների տվյալների վերաբերյալ

«Մենք ձեր անձնական տվյալների հետ որևէ գործ չունենք»,- Կառավարության նիստի ընթացքում հայտարարել է վարչապետ Նիկոլ Փաշինյանը՝ անդրադառնալով հեռախոսների վերահսկման և տվյալների անվտանգության վերաբերյալ քննարկումներին։

Նրա խոսքով՝ պետությունը չի հետաքրքրվում քաղաքացիների անձնական հաղորդագրություններով, ձայնային նյութերով կամ առօրյա նախասիրություններով։

«Մենք ոչ ձեր մեսիջներն ենք նայում, ոչ ձեր ձայնայինները, ոչ էլ՝ ինչ երաժշտություն եք լսում կամ ինչ սնունդ եք նախընտրում։ Պապայի արև, մենք դրա հետ գործ չունենք»,- ասել է Փաշինյանը։

Վարչապետը նշել է, որ մարդիկ լայնորեն օգտագործում են օտարերկրյա արտադրության հեռախոսներ, ժամացույցներ ու ականջակալներ, որոնց միջոցով տարբեր տվյալներ են հավաքագրվում, սակայն այդ հարցը հաճախ չի քննարկվում։

«Երբ խոսքը վերաբերում է սեփական երկրում սահմանված կարգով ստուգելուն, օրինակ՝ պարզելու՝ սարքը մաքսանենգ ճանապարհո՞վ է ներմուծվել, թե՞ ոչ, անմիջապես առաջանում է անձնական տվյալների պաշտպանության հարցը»,- ասել է նա։

Փաշինյանի խոսքով՝ ժամանակակից աշխարհում քաղաքացիների բազմաթիվ տվյալներ տարբեր համակարգերում կուտակվում են, և կարևոր է հասկանալ այդ գործընթացների վերաբերյալ իրական ռիսկերը։

«Այն, որ այդ կուտակված տեղեկատվությունը կարող է տարբեր նպատակներով օգտագործվել պետության և ժողովրդի դեմ, հաճախ չի քննարկվում։ 21-րդ դարում պետք է գիտակցել՝ ամբողջական գաղտնիություն գրեթե գոյություն չունի»,- նշել է վարչապետը։