Սահմանադրությունը փոխելու գործընթացը մտնում է վճռական փուլ․ Փաշինյանը հայտարարեց նոր ժամկետ

Հայաստանի նոր Սահմանադրության փոփոխությունների օրակարգը ներառված է իշխող մեծամասնության նախընտրական ծրագրում, և դրա տեքստը հանրությանը կներկայացվի մինչև տարեվերջ։ Այս մասին լրագրողների հետ ճեպազրույցում հայտարարել է վարչապետ Նիկոլ Փաշինյանը՝ պատասխանելով նոր Սահմանադրության հրապարակման ժամկետների վերաբերյալ հարցին։

Անդրադառնալով Ադրբեջանի արտաքին գործերի նախարար Ջեյհուն Բայրամովի հայտարարություններին, ըստ որոնց՝ Հայաստանի Սահմանադրությունից «տարածքային պահանջների» վերաբերյալ դրույթները չհանելու դեպքում խաղաղության պայմանագիր չի կնքվի, Փաշինյանը նշել է, որ Հայաստանը շարունակելու է աշխատել խաղաղության գործընթացի ինստիտուցիոնալացման ուղղությամբ։

«Արտաքին քաղաքականության ոլորտում մենք Հայաստանի ներքին կյանքին վերաբերող հարցեր չենք քննարկում։ Սահմանադրության փոփոխության օրակարգը ներառված է ՀՀ կառավարող մեծամասնության նախընտրական ծրագրում։ Այդ ծրագրում արձանագրված է նոր Սահմանադրության ընդունման անհրաժեշտությունը, և 726 հազար քաղաքացի քվեարկել է դրա օգտին»,- ասել է Փաշինյանը։

Վարչապետի խոսքով՝ ներկայում խորհրդարանում առկա ուժերի հարաբերակցությունը հնարավորություն չի տալիս Սահմանադրության փոփոխություններն իրականացնել միայն գործող մեխանիզմներով։

Նա նշել է, որ ՔՊ վարչության անդամներն ունեցել են առաջարկներ, սակայն նախընտրական շրջանի պատճառով որոշվել է քննարկումները հետաձգել մինչև ընտրությունների ավարտը՝ գործընթացը ավելի լայն և պատշաճ քննարկումների պայմաններում իրականացնելու համար։

«Այժմ ժամկետը լրացել է, առաջարկները քննարկվել են, և մինչև տարվա վերջ մենք կհրապարակենք տեքստը»,- նշել է Նիկոլ Փաշինյանը։