Սպերցյանը կհասնի մեծ հաջողությունների. սաուդցի գործակալը՝ հայ ֆուտբոլիստի մասին

Ֆուտբոլային գործակալ Ահմեդ ալ-Մուալիմը մեկնաբանել է Հայաստանի ազգային հավաքականի կիսապաշտպան Էդուարդ Սպերցյանի տեղափոխությունը «Կրասնոդարից» սաուդյան «Ալ-Ահլի» ակումբ:

Ֆուտբոլային գործակալ Ահմեդ ալ-Մուալիմը մեկնաբանել է Հայաստանի ազգային հավաքականի կիսապաշտպան Էդուարդ Սպերցյանի՝ «Կրասնոդարից» սաուդյան «Ալ-Ահլի» աղմկահարույց տեղափոխությունը: Փորձագետը վստահ է, որ հայ ֆուտբոլիստի խաղային ինտելեկտն ու փորձը կօգնեն նոր ակումբին լուծել ամենահավակնոտ խնդիրները։

Ալ-Մուալիմը նշել է, որ վաղուց և մեծ ուշադրությամբ հետևում է Սպերցյանի կարիերայի զարգացմանն ու խաղադաշտում նրա կայացրած մարտավարական որոշումներին։ Գործակալն ընդգծել է, որ հիանալի հարաբերությունների մեջ է կիսապաշտպանի ներկայացուցիչների հետ, թեև անձամբ չի մասնակցել տրանսֆերի ձևակերպման գործընթացին: Սաուդյան մասնագետի կարծիքով՝ Մերձավոր Արևելք տեղափոխվելը հիանալի և ժամանակին արված մարտահրավեր է խաղացողի համար:

««Կրասնոդարում» Սպերցյանն առանցքային ֆուտբոլիստ էր: Կարծում եմ՝ Սաուդյան Արաբիայում ևս նա կարող է լիովին դրսևորել իրեն և հասնել մեծ հաջողությունների: Սա նրա համար չափազանց կարևոր փորձ կլինի՝ հաշվի առնելով, թե ինչպիսի բարձր նպատակներ է դնում իր առջև «Ալ-Ահլին»»,- ալ-Մուալիմի խոսքերը մեջբերում է Euro-Football.Ru-ն:

Հիշեցնենք, որ հուլիսի 7-ին պաշտոնապես հայտնի դարձավ, որ «Կրասնոդարի» արդեն նախկին ավագ Էդուարդ Սպերցյանը միացել է «Ալ-Ահլիին»: Սաուդյան Պրո-Լիգայի գործող բրոնզե մեդալակրի հետ ֆուտբոլիստի պայմանագիրը կնքվել է «3+1» ձևաչափով։ Սպերցյանը նոր թիմակիցներին կմիանա Ավստրիայում կայանալիք նախամրցաշրջանային ուսումնամարզական հավաքի ժամանակ։

26-ամյա կիսապաշտպանը «Կրասնոդարի» ակադեմիայի սան է, իսկ ակումբի գլխավոր թիմում հանդես էր գալիս 2021 թվականից։ Ընդհանուր առմամբ՝ «ցլերի» կազմում նա մասնակցել է 185 հանդիպման՝ դառնալով 58 գոլի և 50 գոլային փոխանցման հեղինակ։ Միայն ավարտված՝ 2025/26 մրցաշրջանում Սպերցյանը ռուսական ակումբի կազմում անցկացրել է 42 խաղ՝ դառնալով 14 գնդակի և 18 ասիստի հեղինակ։ Հեղինակավոր Transfermarkt պորտալը Հայաստանի հավաքականի ֆուտբոլիստի տրանսֆերային արժեքը ներկայումս գնահատում է 25 միլիոն եվրո։