Ռուբինյանը՝ Խաչատրյանին. «29,743 քառ. կմ թիվը հենց ձեզնից ենք վերցրել»

Ազգային ժողովի օգոստոսի 11-ի նիստում խորհրդարանի նախագահ Ռուբեն Ռուբինյանն արձագանքել է «Հայաստան» խմբակցության քարտուղար Արթուր Խաչատրյանի հարցին՝ կապված Հայաստանի Հանրապետության տարածքի 29,743 քառակուսի կիլոմետր ցուցանիշի հետ։

Խաչատրյանը հետաքրքրվել էր, թե ինչու նախկինում ՀՀ տարածքը ներկայացվում էր որպես 29,8 հազար քառակուսի կիլոմետր, իսկ այժմ իշխանությունները նշում են 29,743 քառակուսի կիլոմետր թիվը և որտեղից է այն վերցվել։

Ի պատասխան՝ Ռուբինյանը նշել է, որ դեռևս 2005 թվականին ՀՀ կառավարությունը, Ռոբերտ Քոչարյանի ստորագրությամբ, վավերացրել է «ՀՀ հողային ֆոնդի առկայության և բաշխման վերաբերյալ հաշվետվությունը», որտեղ Հայաստանի հողային ֆոնդը ներկայացված է 2 միլիոն 974 հազար 300 հեկտար ծավալով, ինչը համապատասխանում է 29,743 քառակուսի կիլոմետրի։

Նրա խոսքով՝ նույն տվյալը ներառված է եղել նաև 2010 և 2015 թվականների պաշտոնական փաստաթղթերում, իսկ հանրագիտարաններում և այլ աղբյուրներում հաճախ օգտագործվել է կլորացված՝ 29,8 հազար քառակուսի կիլոմետր ցուցանիշը։

«Երբ հարցնում եք, թե որտեղից է 29,743 քառակուսի կիլոմետր թիվը, կարող եմ ասել՝ այն վերցրել ենք հենց ձեր իշխանությունների ժամանակաշրջանի պաշտոնական փաստաթղթերից։ Եթե հարց կա, թե որտեղ են «կորել» մնացած հեկտարները, ապա դրա պատասխանը պետք է փնտրել հենց այդ ժամանակահատվածի տվյալներում»,– նշել է Ռուբինյանը։

Խոսնակը նաև հումորային ակնարկ է արել՝ ռուսերեն հավելելով. «Главное — в ходе следствия не выйти на самого себя» («Գլխավորը՝ քննության ընթացքում ինքներդ ձեզ վրա չհասնելն է»)։