Ռուսաստանում անվանել են «այլ մոլորակ հիշեցնող» 10 վայր

Ռուսաստանի տուրօպերատորների ասոցիացիան կազմել է երկրի 10 ամենաարտասովոր բնական վայրերի ցանկը, որոնց տեսարանները, ըստ մասնագետների, այլ մոլորակ են հիշեցնում։

Ցանկի առաջին հորիզոնականում Կամչատկայի Գեյզերների հովիտն է, որտեղ գտնվում են ավելի քան 40 գեյզեր և հարյուրավոր տաք աղբյուրներ։ Առանձնացվել է նաև Սախալինի Մոներոն հրաբխային կղզին, որի ափերի մոտ ջուրն այնքան թափանցիկ է, որ ծովի հատակը տեսանելի է մինչև 40 մետր խորության վրա։

Տասնյակում ընդգրկվել է նաև «Ալթայան Մարսը»՝ կարմիր, նարնջագույն և դեղին երանգներով լեռնալանջերով տարածքը։ Ցանկում են նաև Բայկալը, Պուտորանա սարահարթը՝ ավելի քան 25 հազար լճերով և բազմաթիվ ջրվեժներով, ինչպես նաև դժվարամատչելի Շանտարյան կղզիները։

Ամենաարտասովոր վայրերի շարքում հայտնվել են նաև Վորոնեժի մարզի «Դիվնոգորյե» արգելոց-թանգարանը, որը հայտնի է որպես «ռուսական Կապադովկիա», Տոմսկի մարզի Տալովյան գավաթները, Մուրմանսկի մարզի «Տոնյա Տետրինա» էթնոպարկը և Կարելիայի Կուզովա կղզախումբը։