ԱՄՆ-ից վառելիքի մատակարարումները փոխում են Կուբայի էներգետիկ շուկան

ԱՄՆ-ից մասնավոր ընկերությունների համար վառելիքի մատակարարումները սկսել են զգալի փոփոխություններ առաջացնել Կուբայի՝ տասնամյակներ շարունակ պետության կողմից վերահսկվող էներգետիկ ոլորտում։ Reuters-ի փոխանցմամբ՝ Վաշինգտոնի սահմանած նավթային շրջափակման պայմաններում ամերիկյան ընկերություններին թույլատրվել է վառելիք արտահանել Կուբայի մասնավոր բիզնեսներին։

Փետրվարից մայիս ԱՄՆ-ից կուբայական մասնավոր ընկերություններին մատակարարվել է շուրջ 900 հազար բարել վառելիք։ Դա բավարար է երկրի էներգետիկ պահանջարկը մոտ ինը օր ապահովելու համար։ Մատակարարումների մի մասը հայտնվել է նաև սև շուկայում, որտեղ գարնանը բենզինի գինը հասել էր մինչև 10 դոլարի մեկ լիտրի դիմաց։ Ներմուծման ծավալների ավելացումից հետո գները որոշ չափով նվազել են։

Վառելիքի ճգնաժամը սրվել է այն բանից հետո, երբ դադարել են Կուբայի ավանդական մատակարարներ Վենեսուելայից և Մեքսիկայից նավթի մատակարարումները։ Խնդիրը հարվածել է հասարակական տրանսպորտին, առողջապահությանը, դպրոցներին և էլեկտրամատակարարմանը։ Միաժամանակ մասնավոր ռեստորանները, խանութներն ու տաքսիները հնարավորություն են ստացել օգտվել ներմուծվող վառելիքից։

Կուբայի իշխանությունները սկսել են նաև աստիճանաբար բացել էներգետիկ ոլորտը մասնավոր և օտարերկրյա ներդրումների համար։ Հուլիսի վերջին արդեն մոտ 200 կուբայական ընկերություն վառելիքի մեծածախ վաճառքի թույլտվություն էր ստացել, իսկ կառավարությունը հաստատել էր նաև վառելիքի ներմուծմամբ և վաճառքով զբաղվող առաջին օտարերկրյա ներդրումային նախագիծը։

Սակայն նոր համակարգը խորացնում է նաև սոցիալական անհավասարությունը։ Կուբայում պետական հատվածի միջին աշխատավարձը ամսական մոտ 10 դոլար է, ինչի պատճառով ներմուծվող թանկ վառելիքը բնակչության մեծամասնության համար գործնականում անհասանելի է։ Փորձագետների գնահատմամբ՝ մասնավոր ներմուծումը Կուբային օգնում է խուսափել ամբողջական տնտեսական և տրանսպորտային կաթվածից, սակայն միաժամանակ ավելի է մեծացնում տարբերությունը վճարունակ և ցածր եկամուտ ունեցող բնակիչների միջև։