Ռուսաստանն ազատ է արձակել ԱՄՆ նախկին ծովային հետևակային Ռոբերտ Գիլմանին

Ռուսաստանն ազատ է արձակել ԱՄՆ նախկին ծովային հետևակային և անգլերենի ուսուցիչ Ռոբերտ Գիլմանին այն բանից հետո, երբ նախագահ Վլադիմիր Պուտինը նրան ներում է շնորհել մարդասիրական նկատառումներից ելնելով, հայտնում է Reuters-ը՝ հղում անելով ամերիկացի պաշտոնյաներին։

Նրանց տվյալներով՝ 32-ամյա Գիլմանն արդեն լքել է Ռուսաստանը և ԱՄՆ Պետքարտուղարության ինքնաթիռով կտեղափոխվի Վաշինգտոնի մերձակայքի Դալլեսի անվան օդանավակայան։ Թռիչքի ընթացքում նրան ուղեկցում են չորս բժիշկներ, որոնք կգնահատեն նրա վիճակը։ Նրա հետ է նաև մայրը՝ Նինան։

ԱՄՆ ժամանելուց հետո Գիլմանին նախատեսվում է ուղարկել Թեքսաս նահանգի Սան Անտոնիո քաղաքի վերականգնողական կենտրոն՝ հետագա բուժման համար։ Ամերիկացի պաշտոնյաներից մեկը Reuters-ին հայտնել է, որ, չնայած իր կրած փորձություններին, Գիլմանն այժմ համեմատաբար լավ տեսք ունի․ նա կարողանում է քայլել և խոսել։

Ազատ արձակմանը նախորդել էին Գիլմանի ընտանիքի դիմումները ռուսական իշխանություններին։ Հարազատները զգուշացնում էին, որ կալանքի ընթացքում ենթադրյալ մի քանի ամիս տևած դաժան վերաբերմունքից հետո նա գտնվում է «մահամերձ վիճակում»։ Ինչպես հաղորդվում էր, ԱՄՆ պետքարտուղար Մարկո Ռուբիոն ևս նրա ազատ արձակման հարցը բարձրացրել էր անցյալ ամիս Ֆիլիպիններում Ռուսաստանի արտգործնախարար Սերգեյ Լավրովի հետ հանդիպման ժամանակ։

Գիլմանը ձերբակալվել էր Վորոնեժում 2022 թվականի հունվարին՝ մի միջադեպից հետո, որի ընթացքում նրան մեղադրեցին ոստիկանության աշխատակցի վրա հարձակվելու մեջ։ Նույն տարվա հոկտեմբերին դատարանը նրան դատապարտեց երկու տարվա ազատազրկման։ 2025 թվականի դեկտեմբերին նրան նշանակվեց ևս ութ տարվա ազատազրկում՝ ուղղիչ հիմնարկի աշխատակիցների վրա հարձակվելու մեղադրանքով։

Հունիսի վերջին Գիլմանի առողջական վիճակը կտրուկ վատթարացել էր։ Reuters-ի տվյալներով՝ նա ընկել էր մի վիճակի մեջ, որը բժիշկները գնահատել էին որպես «դիսոցիատիվ ընդարմացում», որից հետո նրան բանտային հիվանդանոցից տեղափոխել էին Վորոնեժի քաղաքացիական հիվանդանոցի հոգեբուժական բաժանմունք։

Ռուսական լրատվամիջոցները, հղում անելով փաստաբան Իրինա Բրաժնիկովային, հայտնում էին, որ Գիլմանը հոգեբուժական բաժանմունքում էր հուլիսի սկզբից։ Միաժամանակ, առկա տվյալներով, նրա մորը թույլ չէին տալիս այցելել որդուն՝ չնայած դատարանի որոշմանը, որը նրան նման իրավունք էր տրամադրել։

Մոսկվան առայժմ պաշտոնապես չի մեկնաբանել ազատ արձակման մասին հաղորդագրությունը։ Երեքշաբթի օրվա դրությամբ Կրեմլի կայքում նույնպես հրապարակված չէր Գիլմանին ներում շնորհելու մասին փաստաթուղթը։

Մինչ ազատ արձակվելը Գիլմանն առնվազն այն ութ ԱՄՆ քաղաքացիներից մեկն էր, որոնք գտնվում են ռուսական բանտերում, և որոնց ազատ արձակմանը ձգտում է Դոնալդ Թրամփի վարչակազմը։