«Դուք այդ մարդուն լավությո՞ւն եք անում, թե՞ վատություն»․ Կոնջորյանի հարցը ընդդիմությանը

Ազգային ժողովում շարունակվում է պետական-իրավական հարցերի մշտական հանձնաժողովի նախագահի պաշտոնում առաջադրված Արուսյակ Ջուլհակյանի թեկնածության քննարկումը։

Քննարկման ընթացքում ելույթով հանդես եկավ ԱԺ նախագահի տեղակալ Հայկ Կոնջորյանը, որը, դիմելով ընդդիմադիր պատգամավորներին, մասնավորապես «Ուժեղ Հայաստան» խմբակցությանը, հայտարարեց, որ կարող է ընդամենը մեկ անուն-ազգանուն հնչեցնել, և նրանք անմիջապես կարձագանքեն։

«Կարո՞ղ եք հիմա չմտածել այն անուն-ազգանունի մասին, որը չեք ցանկանում լսել։ Չեք կարող, որովհետև հոգեբանության մեջ հայտնի օրինակ կա՝ «մի պատկերացրեք սպիտակ արջ»։ Մարդն այդ պահին ակամայից հենց սպիտակ արջն էլ պատկերացնում է։ Նույնն էլ այստեղ է․ դուք չեք կարող չմտածել այն մարդու մասին, որի անունը ձեզ այդքան անհանգստացնում է»,– ասաց Կոնջորյանը։

Նրա խոսքով՝ խորհրդարանում ցուցաբերվող պահվածքը միայն ավելի մեծ ուշադրություն է հրավիրում այդ անձի շուրջ ձևավորված քննարկումների վրա։

«Այսօր լրագրողները բավական նյութ ստացան՝ հետևելով ձեր արձագանքներին։ Ստացվում է՝ դուք ինքներդ եք այդ թեման դարձնում մեդիայի գլխավոր օրակարգերից մեկը։ Ընդ որում, սա նոր պատմություն չէ, և վստահ եմ՝ շատերը վաղուց տեղյակ են եղել դրա մասին»,– նշեց ԱԺ նախագահի տեղակալը։

Հիշեցնենք, որ խորհրդարանում բանավեճ էր ծագել Հայ Առաքելական եկեղեցու և Ամենայն Հայոց Կաթողիկոս Գարեգին Բ-ի վերաբերյալ հնչած հայտարարությունների շուրջ։

Ավելի վաղ՝ օգոստոսի 11-ի նիստում, Ազգային ժողովի նախագահ Ռուբեն Ռուբինյանը ընդդիմադիր պատգամավորներին կոչ էր արել չընդհատել ելույթ ունեցողներին՝ զգուշացնելով, որ հակառակ դեպքում կստանան համարժեք արձագանք։