Կաթնամթերքն ու բենզինը նորից թանկացան

Կաթնամթերքը կրկին թանկացել է: Այս հարցի շուրջ պարզաբանումներ ստնալու նպատակով ԼՈՒՐԵՐ.com-ը զրուցեց Սպառողների ասոցացիայի նախագահ Արմեն Պողոսյանի հետ, որը հեռախոսազանգին պատասխանելուն պես, անմիջապես ասաց. «Գների թանկացման համա՞ր եք զանգահարել»:

Ինչո՞վ է պայմանավորված այս թանկացումը հարցին Պողոսյանը պատասխանեց, որ դեռ մտածում է: Իսկ հարցին՝  արդյո՞ք սա տնտեսական ճգնաժամի, թե՞ անբարեխիղճ մրցակցության և մոնոպոլ տնտեսության հետևանք է,  Պողոսյանն ասաց. «Միանշանակ սա մրցակցություն է: Նախ մեր երկրում գներին հետևելու և զսպելու պարտականությունը Կենտրոնական բանկի վրա է: Գների աճն օրինաչափություն է: Արևմուտքում նույնպես բարձրանում են գները, պարզապես եկամուտները, այդ թվում՝ աշխատավարձերը, թոշակ, նպաստ, առաջանցիկ տեմպով են բարձրանում: Այնտեղի օրինաչափությունն այն է, որ գները բարձրանում են 3-4%-ով, եկամուտները բարձրանում են 5-9%-ով: Հիմա Կենտրոնական բանկի ֆունկցիան ո՞րն է. երկրում արտադրված կամ ներկրված ապրանքների և ծառայությունների գումարին համապատասխան փող է տպվում, և եթե այդ համամասնությունը կորում է, ուրմեն՝ դա էլ մի հանգամանք է, որ գների աճ տեղի ունենա: Հիմա մեր Սպառողների միությունը կամ հասարակական կառույցները չունեն այդ հնարավորությւոնները, որ ամենուրեք հետևեն գներին և ամբողջ այդ ապրանքային շուկային: Մենք պարզապես մեր դժգոհությունը պետք է  ձևակերպած  հասցնենք համապատասխան կառույցներին, որ քայլեր ձեռնարկվեն: Ես առավել քան համոզված եմ, որ մրցակցության անվերահսկելի վիճակն է պատճառը: Եվ հետո, դուք միայն խոսում եք կաթնամթերքի գների բարձրացումից: Բայց ես ստացել եմ նաև ահազանգեր բենզինի և մեքենայի սպասարկման հետ կապված քսայուղերի թանկացման մասին: Թանկացել է նաև աղբահանությունը: Այս բոլորը նույն տրամաբանության մեջ քայլեր են, և դա ես անվանել եմ արատավոր տնտեսական քաղաքականություն: Եթե մենք վճարունակ լինենք, ապա այդ գների թանկացումը մեզ վրա այդքան շատ չի ազդի: Այդ թանկացումները վատ են նրանով, որ մենք վճարունակ չենք: Մեր երկրում կա մի խավ, որի վրա այս թանկացումները բացարձակ չեն ազդում, և դա մոտավորապես 12% է կազմում: Իսկ մեզ հետաքրքրում է մնացած 88%-ը»։

Այս ամենից կարելի՞ է հետևություն անել, որ թանկացումները սպասված էին. ի պատասխան՝  Սպառողների միության նախագահն ասաց. «Կարելի է և այդպես ասել: Եվ անընդհատ են թանկանում, բայց այնպես են թանկանում, որ մենք չենք էլ հասցնում դրան արձագանքել»: