Բարձր լեռնային բնակավայրերում աշխատավարձերը կբարձրանան

Հակոբ Հակոբյանի նախագահությամբ այսօր տեղի է ունեցել ԱԺ սոցիալական հարցերի մշտական հանձնաժողովի նիստը: Առաջին ընթերցմամբ քննարկվել է «ՀՀ աշխատանքային օրենսգրքում լրացում կատարելու մասին» օրենքի նախագիծը, որը ներկայացրեց օրինագծի հեղինակ, ԱԺ պատգամավոր Ռուզան Առաքելյանը: Նա նշել է, որ նախագծով նախատեսվում է լրացուցիչ սոցիալ-աշխատանքային երաշխիք սահմանել բարձր լեռնային բնակավայրերում աշխատողների համար: Նախագծով առաջարկվում է ՀՀ աշխատանքային օրենսգրքով սահմանել հավելման նվազագույն չափեր՝ բարձր լեռնային բնակավայրերում աշխատողների հիմնական աշխատավարձին: Նախագծի ընդունման արդյունքում բարձր լեռնային բնակավայրերում որոշակիորեն կբարձրանա աշխատավարձերի մակարդակը, ինչն էլ իր հերթին կխթանի այդ բնակավայրերում արդյունավետ զբաղվածությունը, կբարելավի սոցիալական եւ ժողովրդագրական վիճակը: Նախագծով նախատեսվում է նաեւ կանխարգելել բարձր լեռնային բնակավայրից աշխատուժի արտաքին եւ ներքին տեղաշարժը:

Աշխատանքի եւ սոցիալական հարցերի փոխնախարար Արայիկ Պետրոսյանը քննարկվող օրինագծի վերաբերյալ ներկայացրել է կառավարության բացասական եզրակացությունը: Փոխնախարարը նշել է, որ ՀՀ կառավարությունը լեռնային եւ բարձր լեռնային բնակավայրերի ամրապնդումը, տարածքային համաչափ զարգացումը համարում է իր գործունեության կարեւոր, գերակա ուղղություններից մեկը եւ այդ նպատակով առաջիկա տարիներին նախաձեռնել է համալիր, համակողմանի մոտեցումներ քայլ առ քայլ անդրադառնալով ու անհրաժեշտ լուծումներ տալով սոցիալական հրատապ խնդիրներին, այդ թվում աշխատավարձերին: Այդ լուծումները կներառեն պետական հատվածի աշխատողների աշխատավարձերի նկատմամբ հավելավճարների սահմանումը, սոցիալական ծրագրերի փաթեթը՝ սուբսիդավորման տեսքով, ինչպես նաեւ բանկային տոկոսների սուբսիդավորումը: Ըստ Արայիկ Պետրոսյանի՝ ինչ վերաբերում է օրենքի նախագծով առաջարկվող լուծմանը՝ հիմնական աշխատավարձի նկատմամբ հավելումներ սահմանելուն, ապա դրա ընդունման դեպքում այն մասնավոր հատվածում կհանգեցնի աշխատուժի վրա կատարվող լրացուցիչ ծախսերի ավելացման եւ կարող է էապես խոչընդոտել լրացուցիչ ներդրումները, ինչպես նաեւ կարող է առկա աշխատատեղերի կրճատման առիթ դառնալ, իսկ ծրագրի իրականացումը միայն մեկ տարվա 2012 թվականի համար, Հայաստանի Հանրապետության պետական կառավարման մարմինների պահպանման ծախսերի գծով Հայաստանի Հանրապետության պետական բյուջեից լրացուցիչ կպահանջի 165.0 մլն դրամ:

Հանձնաժողովի դրական եզրակացությամբ քննարկված օրինագիծը կընդգրկվի ԱԺ գարնանային նստաշրջանի օրակարգի նախագծում:

Հեղինակների առաջարկով մինչեւ 30, 60 եւ 90 օրով հետաձգվեցին մի շարք օրենքների նախագծերի քննարկումներ: