2011թ. խոշորագույն հարկատուները ՀՀ–ում (աղյուսակ)

ՀՀ Պետեկամուտների կոմիտեն հրապարակել է 2011թ. Հայաստանի խոշոր հարկատուների ցանկը։
Ըստ հրապարակման՝ առաջին տեղում է «Զանգեզուրի պղնձամոլիբդենային կոմբինատը» (ԶՊՄԿ)՝ 29.8 մլրդ դրամ ցուցանիշով։ ԶՊՄԿ-ին ընդամենը 1 մլրդ դրամ չի բավականացրել՝ կրկնելու Հայաստանի պատմության մեջ երբևէ գրանցված առավելագույն ցուցանիշը, որը գրանցել է «Ղ-Տելեկոմ» (ապրանքանիշը՝ «Վիվա-Սել ՄՏՍ») ընկերությունը՝ 2008թ.՝ 30.8 մլրդ դրամ։ Այնուամենայնիվ հանքարդյունաբերական հսկան մեկ տարվա ընթացքում կտրուկ վերելք է գրանցել՝ 5-րդ տեղից բարձրանալով 1-ին հորիզոնական և ընդհանուր առմամբ պետական բյուջե վճարելով շուրջ 2.4 անգամ ավել հարկ։

Նախորդ տարվա առաջատար «Հայռուսգազարդը» հայտնվել է 2-րդ տեղում՝ 21.8 մլրդ դրամ ցուցանիշով։ Երրորդ տեղում «Ղ-Տելեկոմն» է 17.7 մլրդ դրամ ցուցանիշով։ Վերջինս ևս գրանցել է հարկային վճարումների աճ՝ 30%-ով։ Հայաստանի խոշորագույն բջջային օպերատորից ընդամենը 35 մլն պակաս է վճարել 4-րդ տեղում գտնվող «Ալեքս Գրիգը»։ Աժ պատգամավոր Սամվել Ալեքսանյանին պատկանող ընկերությունը, որն իր մեջ ներառում է «Երևան Սիթի» սուպերմարկետների ցանցը և ներմուծման ու արտադրության մի քանի ուղղություններ, 1 տարվա ընթացքում ավելացրել է հարկային վճարումները 10.7%-ով։

Նկատենք, սակայն, որ Ալեքսանյանի ընկերության հարկերում շարունակում են համեմատաբար փոքր կշիռ ունենալ ուղղակի հարկերը՝ ընդամենը 5%։ Այնուամենայնիվ այն 1%-ային կետով ավել է նախորդ տարվա ցուցանիշից։
5-րդ տեղում կապի մյուս հսկան է՝ «ԱրմենՏելը», որը վճարել է 12.6 մլրդ դրամ։ «Արմենտելը» 2011թ.-ին 15%-ով ավելի քիչ է հարկ մուծել, քան 2010թ.։

6-րդ և 7-րդ տեղերում վառելիք ներկրող «Սիթի Պետրոլ Գրուպ» և «Ֆլեշ» ընկերություններն են՝ համապատասխանաբար՝ 10.5 և 10.4 մլրդ դրամ ցուցանիշով։ Թեև երկու ընկերությունների հարկային վճարումները նվազել են մեկ տարվա ընթացքում, այնուամենայնիվ, նրանց վճարած ուղղակի հարկերը շատ կտրուկ աճ են արձանագրել՝

համապատասխանաբար 47 և 27 անգամ։ Մասնավորապես եթե «Սիթի Պետրոլ Գրուպը» 2010թ. վճարել էր ընդամենը 7.8 մլն դրամ ուղղակի հարկ, ապա 2011թ.՝ 369.5 մլն, Իսկ «Ֆլեշը»՝ 429.1 մլն դրամ՝ նախորդ տարվա 15.3 մլն-ի փոխարեն։
Խոշորագույն հարկատուների առաջատար տասնյակի մյուս ընկերություններն են «Հայաստանի էլեկտրական ցանցերը»՝ 9.6 մլրդ դրամ, «Ֆիլիպ Մորիս Արմենիան»՝ 6.3 մլրդ դրամ և «Արմենիա» միջազգային օդակայանները»՝ 5.9 մլրդ դրամ։
2011թ. առաջին 100 խոշոր հարկատուները միասին վճարել են 299.7 մլրդ դրամ հարկեր, ինչը 13.7%-ով գերազանցում է նախորդ տարվա ցուցանիշը։

100 խոշոր հարկատուներից 72-ը արձանագրել են հարկային վճարումների աճ նախորդ տարվա համեմատ, իսկ նվազում են արձանագրել 28-ը։ Աճ արձանագրածների թվում աչքի են ընկնում հանքարդյունաբերական ոլորտը ներկայացնող ընկերություններն ու բանկերը։

1000 խոշոր հարկատուները միասին 2011թ. վճարել են 483.5 մլրդ դրամ, ինչը 2010թ. 432.8 մլրդ դրամի համեմատ 50 մլրդ դրամով կամ 11.7%-ով ավելի շատ է։ Հիշեցնենք, որ 2012թ. բյուջեով նախատեսված է հարկային հավաքագրումներն ավելացնել 101 մլրդ դրամով։

Ստորև ներկայացնում ենք առաջատար 100-յակի աղյուսակը։ Աղբյուրը՝ Tert.am։