Նոր «աղաղակող» փաստեր՝ Սուրիկ Խաչատրյանի յուրացումների մասին

Aravot.am-ի փոխանցմամբ՝ այսօր Գորիսի՝ 1992-94 թվականների քաղաքապետ, տարածաշրջանի ինքնապաշտպանության կոմիտեի համանախագահ Սամվել Հարությունյանը նոր ապշեցուցիչ փաստեր ներկայացրեց Սյունիքի նախկին մարզպետ Սուրիկ Խաչատրյանի եւ նրա ազգականների յուրացումների հետ կապված: «Մեկուկես տարի առաջ ԱԺ-ն օրենք ընդունեց Ապահովագրական բժշկության մասին: Սուրիկ Խաչատրյանը, տեսնելով փողի համը, անմիջապես անցնում է գործի եւ չարաշահելով իր պաշտոնական դիրքը, 4 հոգու ձեւակերպում է իբրեւ գործակալներ եւ հարկադրում է մարզի գրեթե բոլոր պետական աշխատողներին ապահովագրել իրենց առողջությունը: Յուրաքանչյուր գործարքի արժեքն է 70 հազար դրամ: 3000 հոգու պարտադրում են, մի հսկայական գումար է դա: Իսկ այդ 4 հոգին ահա թե ովքեր են. Սուրիկ Խաչատրյանը տարիներ շարունակ հանդիսացել է եւ այսօր էլ հանդիսանում է «Սյունիք» բարեգործական հիմնադրամի տնօրեն, եւ այդ 4 գործակալներից մեկը այդ հիմնադրամի գործադիր տնօրեն Լեւոն Մեժլումյանի որդին է՝ Մխիթար Մեժլումյանը: 2-րդ գործակալը՝ իր նախկին վարորդ Ռազմիկ Թունյանի, որը վերջին տարիներին աշխատում է Սուրիկ Խաչատրյանի գազալցակայաններից մեկում, նրա որդուն է ձեւակերպում: 3-րդ գործակալը դարձնում է իր նախկին մտերմուհու՝ Սաիդա Ադունցի որդուն, 4-րդը՝ Գորիսի ոստիկանապետ Արմեն Հովհաննիսյանի որդուն: 3000 գործարք է կատարվում, որոնցից յուրաքանչյուր գործարքի, այսինքն՝ յուրաքանչյուր 70 հազար դրամի 22 տոկոսը իբրեւ եկամուտ, ըստ օրենքի հասնում է գործակալին: 3000 անգամ 22 տոկոսը՝ կազմում է 46 մլն դրամ: Այդ գործարքներից մոտավորապես 110 հազար դոլարի եկամուտ են ստանում»: Սամվել Հարությունյանը վստահեցրեց, որ բնականաբար, Սուրիկ Խաչատրյանը չէր կարող այդ գործարքից իր առյուծի բաժինը չունենար, ինչպես բոլոր-բոլոր գործարքներից: Նա Գորիսում մեկ այլ գործարքի եւ յուրացման դեպք է պատմում՝ Սուրիկ Խաչատրյանի մասնակցությամբ. «Տարիներ առաջ՝ 1991-ին Գորիսում կառուցվում էր 4-րդ միջնակարգ դպրոցի նոր շենքը: Այդպես էլ կիսակառույց մնաց: Անձամբ ես ինձնից կախված առավելագույնն արել եմ, որպեսզի շինարարությունը շարունակվի եւ Գորիս քաղաքի այդ դպրոցի աշակերտները հնարավորություն ունենան սովորելու հարմարավետ, նորակառույց դպրոցի շենքում: Մի քանի տարի առաջ այդ դպրոցի շենքը Սուրիկ Խաչատրյանի անմիջական հրահանգով համարվում է տիրազուրկ: Այն հասկանալի պատճառներով գտնվում էր ԿԳ հաշվեկշռի մեջ, բայց համարվում է տիրազուրկ, փոխանցվում Գորիսի քաղաքապետարանին եւ քաղաքապետարանը ոչ ավել, ոչ պակաս՝ կարճ ժամանակ անց 4 մասի է բաժանում, յուրաքանչյուրը՝ 224 քմ տարածքով եւ 4 հոգու վաճառում: 1-ին մասը վաճառվում է Սուրիկ Խաչատրյանի կնոջը՝ Լորետա Բարսեղյանին՝ 1 մլն 224 հազար դրամով, այսինքն՝ ընդամենը 3000 դոլարով: Մյուս 3 մասը նույն գնով վաճառում են, ընդ որում 2-րդ մասը վաճառում են Սուրիկ Խաչատրյանի աներձագ «Տիգրան եւ Տրդատ» ՍՊԸ նախագահ Վարդան Բարսեղյանի անվամբ, 3-րդ մասը՝ Սուրիկ Խաչատրյանի հորեղբոր որդի, Տաթեւի հիդրոէլեկտրակայանների համակարգերի ձեռնարկության տնօրեն Սասուն Խաչատրյանին, իսկ 4-րդ մասը՝ Գորիսի բնակիչ Կամո Բալասանյանին»:

Շարունակությունը՝ այստեղ։