Ոստիկանության ավագ տեսուչը մեղադրվում է և կաշառք վերցնելու մեջ

Դատավարական ղեկավարում իրականացնող դատախազը հաստատել է ոստիկանության ավագ տեսուչի կողմից պաշտոնեական լիազորություններն անցնելու, կաշառք պահանջելու և ստանալու փաստերի առթիվ հարուցված քրեակական գործով մեղադրական եզրակացությունը:

Մինչդատական վարույթում ձեռք բերված փաստական տվյալների համաձայն՝ ՀՀ ոստիկանության Երևան քաղաքի վարչության Շենգավիթի ոստիկանության բաժնի համայնքային ոստիկանության բաժանմունքի ավագ տեսուչ Բ. Ավետիկյանը քաղաքացուց կաշառք է պահանջել՝ իր լիազորությունների շրջանակում Երևան քաղաքի բնակիչ Հ. Մարտիրոսյանի օգտին ակնհայտ ապօրինի անգործություն կատարելու համար, ինչպես նաև՝ անցել իր լիազորությունների շրջանակը՝ կատարելով բռնությամբ զուգորդված գործողություններ:

Մասնավորապես, ըստ քրեական գործի նյութերի՝ Բ. Ավետիկյանը, 2013թ. մայիսի 16-ին նկատելով, որ Երևան քաղաքի Շիրակի 82/18 հասցեի տան սեփականատեր Հ. Մարտիրոսյանը տան՝ ազբեստյա թիթեղով ծածկված ցանկապատը վերակառուցում է քարե պատով, պարզել է, որ իրականացվող շինարարությունը կատարվում է առանց համապատասխան թույլտվության:

Նշված վարչական իրավախախտման փաստն իրեն վերապահված լիազորության շրջանակում չարձանագրելու և ըստ ենթակայության չուղարկելու համար հիշյալ տան սեփականատիրոջ հարևանի՝ Կ.Հարությունյանի միջոցով պահանջել է կաշառք՝ սկզբում հյուրասիրության, ապա նաև՝ գումարի տեսքով:

Այսպես.

Պայմանավորվածության համաձայն՝ նույն օրը Կ.Հարությունյանը գարեջրատանը Բ. Ավետիկյանի համար կազմակերպել է հյուրասիրություն, որից հետո ոստիկանության աշխատակիցն իր աշխատասենյակում պահանջել է նաև գումար՝ 100 000 դրամի չափով:

Այս կապակցությամբ Բ. Ավետիկյանի և Կ.Հարությունյանի միջև վիճաբանություն է սկսվել, որը ոստիկանության բաժանմունքի միջանցքում վեր է ածվել քաշքշուկի և փոխադարձ հայհոյանքների: Այդ ընթացքում Բ.Ավետիկյանը, դուրս գալով իր լիազորությունների շրջանակից, բռնություն է գործադրել Կ. Հարությունյանի նկատմամբ. ձեռնաշղթաներով կապել է վերջինիս ձեռքերը և բազմաթիվ հարվածներ հասցրել նրա մարմնի տարբեր մասերին:

ՀՀ հատուկ քննչական ծառայությունում իրականացված նախաքննությամբ ձեռք բերված ապացույցների հիման վրա Բ.Ավետիկյանին մեղադրանք է առաջադրվել՝ ՀՀ քրեական օրենսգրքի 309-րդ և 311-րդ հոդվածների 2-րդ մասերով: Քրեական գործը մեղադրական եզրակացությամբ ուղարկվել է Երևան քաղաքի Շենգավիթ վարչական շրջանի ընդհանուր իրավասության առաջին ատյանի դատարան: