Դատախազը պահանջել էր 1,5 տարի ազատազրկում, դատարանը դատապարտեց 3 տարով

Կոտայքի մարզի ընդհանուր իրավասության դատարանում ավարտվել է Նարեկ Զարգարյանի մահվան վերաբերյալ քննվող քրեական գործի դատաքննությունը: Մեղադրող Դիանա Զոհրաբյանը ամբաստանյալ Ալվինա Հարությունյանի համար պահանջել էր մեկուկես տարվա ազատազրկում, սակայն դատավոր Մ.Մակյանը նրան դատապարտել է երեք տարվա ազատազրկման, նաև զրկելով նույնքան ժամկետով մեքենա վարելու իրավունքից:

Նշենք, որ Ալվինա Հարությունյանի նկատմամբ ընտրված խափանման միջոցը` ստորագրություն չբացակայելու մասին, մնացել է անփոփոխ: Տուժողի իրավահաջորդին կտրվի մեկուկես միլիոն դրամի քաղհայց ներկայացնելու իրավունք:

Aravot.am-ն անդրադարձել է այս գործի քննությանը, պաշտպանական կողմի միջնորդություններին: Ըստ գործի նյութերի, Ալվինան վիճելով Նարեկի հետ, նստել էր նրա «Համմեր» մակնիշի մեքենան, ներսից փակել էր դռները, առանց Նարեկի թույլտվության, փախցրել էր այն, իսկ Նարեկը կառչել էր մեքենայի ձախ կողնակից: Մեքենան կանգ չէր առել, Նարեկը ընկնելով` մահացել էր:

Տուժողի իրավահաջորդ Նարեկի մայրը` Կամելա Սաֆարյանը դատաքննության փուլում Aravot.am-ին հայտնել էր, որ որդու՝ Նարեկ Զարգարյանի կողմից ընթացքի մեջ գտնվող ավտոմեքենայից կառչելը և գոռոցներով կանգնել պահանջելը միանշանակորեն վկայել են այն մասին, որ Ալվինա Հարությունյանն ավտոմեքենան վարել է Նարեկի կամքին հակառակ, սակայն չնայած դրան, դատախազն այդ արարքը հանցագործություն չէր համարել և ՀՀ քրեական օրենսգրքի 183-րդ հոդվածով` ավտոմեքենային կամ տրանսպորտային այլ միջոցին ապօրինաբար փախցնելը առանց հափշտակելու նպատակի, Ա.Հարությունյանին մեղադրանք չէր առաջադրել: 

Մանրամասն`այստեղ: