Հայաստանի տնտեսության համար որոշակի առաջընթաց գրանցեց արդյունաբերության ոլորտը. Վազգեն Սաֆարյան

Հայրենական ապրանքարտադրողների միության նախագահ Վազգեն Սաֆարյանը այսօր լրագրողների հետ հանդիպման ժամանակ, խոսելով 2011թ. արձանագրված մակրոտնտեսական ցուցանիշների մասին, ասաց. «Անցած տարին Հայաստանի տնտեսության համար որոշակի առաջընթաց գրանցեց հատկապես արդյունաբերության ոլորտը, որտեղ մենք ունեցանք 992 մլրդ դրամին համարժեք արդյունաբերական ապրանքների ծավալ, որը համախառն ներքին արդյունքի մեջ 26%-ից ավելի է, և սա շատ դրական է, որովհետև այս միտումը շարունակվելու հնարավորություն ունի կապված այն հանգամանքով, որ կառավարությունն ընդունեց արդյունաբերության հայեցակարգ՝ ուղղված արտահանմանը և եթե 27,7%-ով ավելացել է մեր արդյունաբերական ապրանքների արտահանումը, սա արդեն խոսում է այն մասին, որ մենք այս տարի կարող ենք ակնկալել մոտավորապես մեկ ու կես մլրդ դոլարի համարժեք արդյունաբերական ապրանքների արտահանում: Այստեղ մենք ունենք թերություն, դա այն է, որ մենք արտահանում ենք հիմնականում հանքահումքային արտադրանք և այստեղ պետք է աստիճանաբար այնպիսի քաղաքականություն տանենք, որ պատրաստի արտադրանք ավելի շատ արտահանենք»:

 Խոսելով մյուս ոլորտների մասին՝ Վազգեն Սաֆարյանը նշեց, որ գյուղատնտեսությունը նույնպես աճ ապահովեց՝ 14,1 տոկոս, նույնքան տոկոս է ապահովել նաև արդյունաբերությունը: Այս ոլորտում կա նաև թերություններ, վատը նա է, որ մենք հիմնականում արտահանում ենք գույքային արտադրանք։ Շինարարության ծավալները մեզանում գնալով նվազում են, և դա բնական պետք է համարել, որովհետև այդ ոլորտի հիմնական գործունեությունը պայմանավորված է դրսից եկած տրանսֆերտներով, որոնք, ըստ էության, արդեն շինարարությունը հագեցել է: Մենք ունենք բնակարաններ, որոնք չեն իրացվում և սա էլ չի խթանում շինարարության նոր ծավալների աճի: