Վեց աշխատակիցներին սպանողը խնդրել է իրեն գնդակահարել դատարանի դահլիճում

Իրավաբան Դմիտրի Վինոգրադովը, ով «Ռիգլա» դեղագործական ընկերության մոսկովյան գրասենյակներից մեկում գնդակահարել է իր վեց աշխատակիցներին, դատական նիստում խնդրել է ուղեկցող պահակախմբի անդամին գնդակահարել իրեն: Ինչպես հայտնում է « Новости» ռուսաստանյան լրատվական գործակալությունը, դատապարտյալի նման բուռն արձագանքի պատճառ էր դարձել իր նախկին ընկերուհի Աննա Կազնիկովայի հարցաքննությունը, ում հետ վիճաբանելուց հետո նա աշխատավայր էր գնացել զենքով:

Դատարանում Կազնիկովան պատմել է, որ Վինոգրադովի հետ ծանոթացել է 2011թ.-ին ՝ աշխատավայրում: Կարճ ժամանակ անց նա սկսել է իրեն ուշադրության նշաններ ցույց տալ, և իրենք սկսել են հանդիպել: Սակայն տղամարդն ավելի ուշ Աննային հեռախոսով ուղարկել է վիրավորական կարճ հաղորդագրություն, և նրանց շփումը դադարել է: Դրանից հետո Վինոգրադովը սկսել է Կազնիկովային սպառնալից նամակներ գրել, որոնցում ասում էր նաև մահվան մասին: Աղջիկը դիմել է «Ռիգլայի» անվտանգության ծառայություն, սակայն այնտեղ այդ սպառնալիքներին նշանակություն չեն տվել:

Կազնիկովայի հարցաքննության ժամանակ Վինոգրադովը դատավորից պահանջել է իրենց փոխհարաբերությունների մասին անձնական բնույթի հարցեր չտալ: Նա իր նախկին ընկերուհուն հարցրել է, թե ուզում է արդյոք, որ իրեն մահապատժի դատապարտեն, ինչին ի պատասխան Կազնիկովան բացասական պատասխան է տվել: Դատավորն իր հերթին Վինոգրադովին պարզաբանել է, թե ռուսաստանյան օրենսդրությունը չի թույլատրում իրեն մահապատժի դատավճիռ արձակել: Այդ ժամանակ էլ Վինոգրադովը սկսել է բռունցքներով հարվածել դահլիճից իրեն բաժանող ապակուն և պահանջել իրեն ազատ արձակել, ինչից հետո էլ նա խնդրել է գնդակահարել իրեն:

Նախօրեին Վինոգրադովն ամբողջությամբ ընդունել էր իր մեղքը մեղադրանքի երկու կետերով՝ «Երկու և ավելի անձանց սպանություն կամ սպանության փորձ» և «Ծայրահեղական գործնեության իրականացման հրապարակային կոչեր»:

«Փաստինֆո»