Մեղսագրվող արարքը կատարելու պահին նա արդեն իսկ փաստաբան չէր

Խոշոր չափերի խարդախության մեջ մեղադրվող Արմինե Մանուկյանին առաջադրված մեղադրանքի համաձայն, նա 2010թ. հուլիս ամսին՝ չարաշահելով Ե. Փարսադանյանի վստահությունը փաստաբանական ծառայություններ իրականացնելու պատրվակով խաբեությամբ վերցրել է 2567670 ՀՀ դրամին համարժեք 7000 ԱՄՆ դոլլար գումար, սակայն ոչ մի գործողություն չկատարելով հափշտակել է նշված գումարը՝ պատճառելով Փարսադանյանին խոշոր չափերի նյութական վնաս:

Երևանի Մալաթիա-Սեբաստիա վարչական շրջանի դատարանի դատավոր Արտակ Զախարյանի վարույթ ընդունված գործի վերաբերյալ այսպես է բառացի նշվում «Դատալեքս» տեղեկատվական համակարգում զետեղված համառոտ մեղադրական եզրակացության մեջ:

«Փաստինֆո» գործակալությունը արձագանքներ ստացավ փաստաբան գործընկերների կողմից, ովքեր նշում էին, որ հիշյալ անձը բնավ փաստաբան չէ: Պարզվեց, որ Ա.Մանուկյանը նախկինում է եղել փաստաբան, սակայն հետագայում զրկվել է փաստաբանական արտոնագրից, սակայն որոշ դեպքերում շարունակել է հանդես գալ որպես փաստաբան։ Այսինքն՝ չարաշահել է իր նախկին կարգավիճակը, մոլորության մեջ գցել փաստաբանական ծառայության կարիք ունեցող անձանց և վերցրել գումարներ։

Հայցում ենք փաստաբանների ներողամտությունը Ա.Մանուկյանին որպես գործող փաստաբան ներկայացնելու համար։