Խաչիկյանի գործով կհարցաքննվի Գյումրու սոցապ տարածքային պետը

Սոցիալական ապահովության պետական ծառայության նախկին պետ Վազգեն Խաչիկյանի ու մյուսների գործով այսօրվա դատական նիստում հարցաքննվել է Գյումրու սոցիալական ապահովության տարածքային պետ վկա Էդուարդ Վարժապետյանը՝ նա սույն գործի անջատված մասով մեղադրյալ է:

Վկան նշեց, որ 2010թ. Խաչիկյանը զանգահարել է իրեն և ասել, որ իրենց տարածքում կենսաթոշակների կրկնակի վճարումներ է եղել և որ պարզեն, թե ինչպես է եղել և իրեն վերադարձնեն այդ գումարները: Վկան հայտնել է, որ Գյումրու սոցիալական ապահովության տարածքային օպերատոր Արթուր Աբրահամյանը խոստովանել է, որ իր մեղքով են եղել կրկնակի վճարումները:

Ա. Աբրահամյանը վկային է փոխանցել սկզբում 20 մլն դրամ, 10 օր անց ևս 9 մլն դրամ, գումարի մի մասը Է.Վարժապետյանին է փոխանցվել ՀՀ դրամով, իսկ մյուս մասը՝ ԱՄՆ դոլարով: Վարժապետյանը նշեց, որ 29 մլն դրամը Խաչիկյանին է տվել 3 ամսվա ընթացքում:

Այս գործով վկա, իսկ գործից անջատված մասով մեղադրյալ Արթուր Աբրահամյանն իր հերթին իր ցուցմունքում վկան նշեց, որ Խաչիկյանը 2010թ. մայիսին կանչել է իրեն և ասել, որ կրկնակի վճարումներ է կատարվել և որ պետք է այդ գումարները վերականգնվեն: Վկան էլ նշված գումարը տվել է Էդուարդ Վարժապետյանին, ով և պետք է գումարը տար Խաչիկյանին: Վկան նշել է, որ ինքը 20 մլն վերականգնել է, իսկ 9 մլն-ի մասին ոչինչ չգիտե: Նա հայտնել է նաև, որ գումարը Վարժապետյանին է տվել 1 ամսվա ընթացքում:

Վկան հայտնել է, որ Խաչիկյանի աշխատասենյակում վերջինս իրեն ասել է՝ «եթե գումարը չտաս՝ այս սենյակից դուրս չես գա» և ավելացրել՝ «զանգիր՝ թող բերեն 29 մլն դրամը»:

Վկայի նախաքննական ու դատաքննական ցուցմունքներում առկա էական հակասությունների պատճառով հրապարակվել են նրա նախաքննական ցուցմունքները: Դրանցում նա, մասնավորապես, նշել էր, որ կրկնակի վճարումները իր մեղքով են եղել, ինքը 3000 դոլար է տվել Վարժապետյանին, որից հետո 20 մլն դրամ:

Հիշյալ երկու վկաների ցուցմունքների միջև առկա անհամապատասխությունների հետ կապված Վազգեն Խաչիկյանը միջնորդել է նորից հարցաքննել Էդուարդ Վարժապետյանին՝ վերջինս իր ցուցմունքում դատարանում հայտնել է, որ 3 ամսվա, իսկ Աբրահամյանը՝ որ 1 ամսվա ընթացքում է գումարը տվել Խաչիկյանին: Դատարանը բավարարեց միջնորդությունը, վկան լրացուցիչ կհարցաքննվի դատարանում:

Օգոստոսի 29-ի դատական նիստում վկաների հարցաքննությունը կշարունակվի:

Մանրամասները՝ «Փաստինֆո»-ում: