Ինչո՞ւ մինչ այժմ Սուրիկ Խաչատրյանին մեղադրանք չի առաջադրվել. Բուդաղյանների փաստաբան

Սյունիքի նախկին մարզպետ Սուրիկ Խաչատրյանի տան մոտ տեղի ունեցած միջադեպի փաստով հարուցված քրեական գործով մեղադրյալ Արտակ Բուդաղյանի դեմ սկսվել է ապատեղեկատվության երկրորդ խոշոր ալիքը՝ Զինդատախազությունը և քննչական մարմինը ամբողջ ուշադրությունը կենտրոնացրել են երկրորդական հարցերի վրա, ընդ որում Արտակ Բուդաղյանի գործողությունները ներկայացվում են գլխիվայր, Ա. Բուդաղյանը ներկայացվում է որպես ագրեսոր: Այսօր լրագրողների հետ հանդիպմանն ասաց Արտակ Բուդաղյանի պաշտպան Հայկ Ալումյանը հավելելով, որ ըստ էության ամեն ինչ արվում է որպեզի տուժած կողմի պահանջատեր կարգավիճակից Ա. Բուդաղյանը հետզհետե փոփոխվի պաշտպանվող սուբյեկտի կարգավիճակի:

«Տեսնելով, որ Արտակ Բուդաղյանին ներկայացված մեղադրանքը որևէ կերպ չի հիմնավորվում,նախաքննական մարմինը արդեն քայլեր է ձեռնարկում որպեսզի նրա մեղադրանքը ծանրացվի»,- կարծիք է հայտնում Հայկ Ալումյանը:

Փաստաբանը նշում է նաև, որ նախ և առաջ առնվազն երկու արարքի համար Սուրիկ Խաչատրյանին պետք է մեղադրանք առաջադրվեր. առաջինը, որ նրա որդին Տիգրան Խաչատրյանը Սուրիկ Խաչատրյանի անվամբ գրանցված զենքից է կրակել, իսկ դա նշանակում է, որ քրեական օրենսգրքի առնվազն մեկ հոդվածով կատարվել է արգելված արարք, և հաջորդը Սուրիկ Խաչատրյանին տանից առգրավվել է ինքնաշեն զենք»,- փաստաբանը հարց է բարձրացնում՝ ինչու մինչ այժմ նրան մեղադրանք չի առաջադրվել:

Նշենք նաև, որ այսօր Արտակ Բուդաղյանի հայրը՝ Էմիլ Բուդաղյանը բաց նամակով դիմել է ՀՀ Նախագահ Սերժ Սարգսյանին՝ խնդրելով որպեսզի Նախագահը իր ուշադրության կենտրոնում պահի գործը: Փաստաբանն ակնկալում է, որ գործը գտնվելով Նախագահի ուշադրության կենտրոնում քննությունը կգնա օբեկտիվ և բոլոր մեղավորները պատասխանատվության կենթարկվեն:

Հայկ Ալումյանը չի բացառում, որ առաջիկայում կդիմի Գլխավոր դատախազությանը՝ կեղծարարներին տեսանյութի բնօրինակը տրամադրած և կեղծիք կատարած անձանց ինքնությունը պարզելու հարցով:

Ի դեպ, վաղը տեղի է ունենալու Արտակ Բուդաղյանի և 4 անձանց հետ առերեսում: Բուդաղյանը առերես կհարցաքննվի քրեական գործով տուժող Նիկոլայ Աբրահամյանի, վկաներ Կարինե Հարությունյանի, Լարիսա Բարսեղյանի և Անգելինա Քայանի հետ' նրանց ցուցմունքներում առկա էական հակասությունների կապակցությամբ:

Հեղինակ՝ «Փաստինֆո»