Կարեն Անդրեասյանի նամակը ՀՀ ոստիկանապետին

Հայաստանի մարդու իրավունքների պաշտպան Կարեն Անդրեասյանը հանդես է եկել նամակով՝ ուղղված ՀՀ ոստիկանապետ Վլադիմիր Գասպարյանին:

«2013 թվականի օգոստոսի 24-ին տեղի ունեցած իրադարձությունների կապակցությամբ ՀՀ մարդու իրավունքների պաշտպանին հասցեագրված դիմում-բողոքների պատշաճ ընթացքն ապահովելու նպատակով անհրաժեշտ է ստանալ Ձեր պարզաբանումները ստորեւ ներկայացվող հարցադրումների վերաբերյալ:

Այսպես, զանգվածային լրատվության միջոցներում լայնորեն տարածված տեսագրության ուսումնասիրության արդյունքում առերեւույթ իրավաչափության խնդիր է առաջանում ՀՀ Ոստիկանության առանձին ծառայողների՝ մի շարք քաղաքացիների նկատմամբ իրականացված գործողությունների վերաբերյալ, մասնավորապես.

• Իրավաչափ եւ անհրաժե՞շտ էր արդյոք Արգիշտի Կիվիրյանի նկատմամբ մեկից ավելի դրվագներում միաժամանակ մի քանի Ոստիկանության ծառայողների կողմից կիրառված ուժը եւ հասցված մարմնական վնասվածքները, հատկապես այն դրվագներում, երբ վերջինիս կողմից դիմադրությունը բացակայում էր. օրինակ՝ Ա. Կիվիրյանին գետնին տապալելը եւ/կամ հարվածելը (Տե՛ս տեսագրություն՝ 08:38 - 09:15: 24:14 - 24:55):

• Իրավաչա՞փ էր արդյոք ակցիային մասնակցող՝ վնասազերծված եւ այլ իրավախախտում չկատարող, անձանց նկատմամբ կիրառված ֆիզիկական ուժը եւ անհարկի ագրեսիվ վերաբերմունք, հատկապես՝ նշված անձանց ոստիկանության ծառայողական մեքենա նստեցնելիս (Տե՛ս տեսագրություն՝ 02:30 - 02:45, 27:38 - 27:48):

• Ինչո՞վ է պայմանավորված եւ ի՞նչ միջոցներ են ձեռնարկվել ոստիկանոթյան առանձին ծառայողների կողմից անհարկի ֆիզիկական ուժի օգտագործումը այն քաղաքացիների նկատմամբ, որոնք տվյալ դրվագում չէին խախտում հասարակական կարգը (Տե՛ս տեսագրություն՝ 15:12 - 15:50):

• Արդյո՞ք պարզաբանվել են ակցիային մասնակցող անձանց իրավունքները՝ վերջիններիս ազատությունը սահմանափակելու պահից (վճռաբեկ դատարանի ԵԱԴԴ 0085/06/09 բերվածի կարգավիճակի առանձնահատկությունները հաշվի առնելով (նախնական եւ կարճաժամկետ բնույթը)՝ բերվածը պետք է օժտված լինի առնվազն հետեւյալ իրավունքներով. ա) իմանալու իրեն արգելանքի վերցնելու պատճառը (բ) տեղեկացնելու իրեն բերման ենթարկելու մասին, (գ) հրավիրելու իր փաստաբանին, (դ) լռելու, օրինակ՝ ոստիկանության ծառայողական մեքենա նստեցնելը:

• Ինչո՞վ է պայմանավորված ոստիկանության ծառայողական մեքենան վարելը այն պարագայում, երբ ակցիայի մասնակիցները մեքենայի առջեւում էին եւ փողոցը մարդաշատ էր (Տե՛ս տեսագրություն՝ 19:45 - 20:20):

• Ինչո՞վ է պայմանավորված Ոստիկանության ծառայողի կողմից շինարարություն իրականացնելու թույլտվության օրինականության վերաբերյալ դիրքորոշում հայտնելը՝ հաշվի առնելով ոստիկանության ծառայության անկողմնակալության սկզբունքը (Տե՛ս տեսագրություն՝ 33:09 - 33:39):

• Ինչո՞վ է պայմանավորված Ոստիկանության մի շարք ծառայողների կողմից քաղաքացիների հետ հաղորդակցման ընթացքում պրոֆեսիոնալիզմի եւ էթիկայի կանոնների թույլ տրված խախտումները, մասնավորապես՝ անհարգալից, վիրավորական արտահայտություններ օգտագործելը (Տե՛ս տեսագրություն՝ 21:04 - 21:53):

Ելնելով վերոգրյալից, հաշվի առնելով դիմումատուների շահերը, ինչպես նաեւ ղեկավարվելով «Մարդու իրավունքների պաշտպանի մասին» ՀՀ օրենքի 12-րդ հոդվածով՝ խնդրում եմ 5-օրյա ժամկետում ներկայացնել Ձեր պարզաբանումները վերոնշյալ հարցադրումների վերաբերյալ, մասնավորապես՝ հստակեցնելով դրանց իրավաչափությունը, հետապանդվող նպատակը եւ թե ինչ միջոցներ են ձեռնարկվել եւ/կամ ձեռնարկվելու Ոստիկանության օրինախախտ ծառայողներին պատասխանատվության ենթարկելու ուղղությամբ»: